Душанбе, 14-уми декабри соли 2024

Маркази миллии тестии назди Президенти Ҷумҳурии Тоҷикистон бори дигар ба таваҷҷуҳи довталабони дар давраи чоруми бақайдгирӣ (аз 29-уми октябр то 7-уми декабр) барои иштирок дар ИМД 2024 номнависшуда мерасонад, ки имтиҳонҳо барои онҳо пагоҳ, яъне рӯзи якшанбе – 15-уми декабр баргузор мегардад.

Хотиррасон мекунем, ки дар бораи макон ва замони имтиҳонсупорӣ ба ҳар довталаб паёмаки телефонӣ (SMS) фиристода шудааст. Ин маълумот барои довталабон дар кабинети инфиродияшон низ дастрас аст. Барои муайян кардани макони ҷойгиршавии маркази имтиҳонӣ аз рӯйхати муассисаҳои таълимии дар заминаашон марказҳои имтиҳонӣ (https://ntc.tj/tj/hamai-khabarho/markazhoi-imtihoni-baroi-barguzorii-davri-chorumi-imd-2024.html) ташкилшаванда, ки дар сомонаи Марказ ҷойгир карда шудааст, истифода кардан мумкин аст.

Таваҷҷуҳ: Вақти оғози имтиҳон соати 10:00 аст. Довталаб бояд ба маркази имтиҳонӣ 1 соату 30 дақиқа пеш аз оғози имтиҳон бо шиноснома ё ҳуҷҷати дигари тасдиқкунандаи шахсияташ (бо муҳр ва сурат) ва ду ручкаи одии рангаш сиёҳ ҳозир шавад.

Лозим ба зикр аст, ки бо худ даъватнома доштан барои воридшавии довталабон ба маркази имтиҳонӣ ҳатмӣ нест. Кофист, ки довталаб дар бораи макони имтиҳонсупориаш маълумот дошта бошад. Агар довталаб то ҳол дар бораи макони имтиҳонсупориаш бо сабабе маълумот пайдо накарда бошад, барои дарёфти маълумоти мазкур метавонад бо телефонҳои 224 53 68 ва 224 53 73 ба Марказ муроҷиат кунад.