Дар шароити имрӯза яке аз вазифаҳои муҳимтарини давлат ва ҷомеа пешгирӣ аз терроризму ифротгароӣ ва ҳифзи наслҳои оянда, махсусан кӯдакону наврасон мебошад, чунки гурӯҳҳои террористӣ бештар ба ҷавононе, ки саводи кофӣ надоранд ва ба осонӣ фирефта мешаванд, рӯй меоваранд. Аввалин омили ҷалби ҷавонон ба гурӯҳҳои ифротӣ бесаводӣ ва хурофот мебошад. Маҳз ҳамин омил ва тамоюли дохилшавии ҷавононро ба гурӯҳҳои ифротӣ ба назар гирифта Ҳукумати Ҷумҳурии Тоҷикистон чораҳои таъхирнопазир андешида истодааст.
Аз ҷумла, бо ташаббус ва дастгирии бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар кишвари азизамон Маркази миллии тестии назди Президенти Ҷумҳурии Тоҷикистон таъсис дода шуд, ки дар доираи принсипҳои адолат, шаффофият, дастрасии баробар ба таҳсил фаъолият менамояд.
Марказ дар доираи фаъолияти худ ба ҷавононе, ки хоҳиши давом додани таҳсил, малакаю маҳорат ва дониши хуб доранд, шароити мувофиқ муҳайё намуд, то ки онҳо ба муассисаҳои таълимии интихобкардаи худ дохил шуда, таҳсилро давом диҳанд ва аз бесаводӣ ва хурофот дур шаванд.
Мавриди зикр аст, ки ҷавонон аз таърихи миллат, арзишҳои фарҳангию динӣ ва сиёсӣ бехабар монанд, душманон ба осонӣ ба ақлу тафаккури ӯ таъсир мерасонанд. Аз ин рӯ, муҳимтарин роҳи пешгирӣ баланд бардоштани сатҳи дониш ва маърифати кӯдакон аз овони хурдсолӣ аст. Дар оила падару модар бояд ба фарзандон муҳаббат ба Ватан, эҳтиром ба қонун ва арзишҳои миллию диниро омӯзонанд. Нақши мактаб ва муассисаҳои таълимӣ дар ин самт хеле бузург аст. Омӯзгорон вазифадоранд, ки дарсҳои таърих, ҳуқуқ ва адабиётро ба хонандагон дуруст шарҳ дода, моҳияти хатарноки фирефташавӣ ба терроризмро фаҳмонанд. Ба ҷои тарс бояд дар дили наврасон ҳисси масъулият, ватандӯстӣ ва ифтихор аз гузаштагони худро бедор намоянд.
Самти дигаре, ки Марказ барои пешгирӣ аз дохилшавии ҷавонон ба гурӯҳҳои ифротгаронӣ роҳандозӣ менамояд, гузаронидани вохӯриҳо ва корҳои иттилоърасонию таблиғотӣ дар байни ҷавонон, бахусус хатмкунандагони муассисаҳои таълимӣ мебошад.
Чун имрӯз истифодаи ғайримақсадноки интернет ва шабакаҳои иҷтимоӣ ба як манбаи асосии тарғиби ифротгароӣ табдил ёфтааст, дар вохӯриҳо таъкид карда мешавад, ки падару модар ва омӯзгорон вазифадоранд, ки истифодаи дурусти интернетро ба кӯдакон омӯзонанд ва онҳоро аз ворид нашудан ба гурӯҳҳои шубҳанок огоҳ созанд.
Дар баробари ин, кормандони Маркази миллии тестиро низ зарур аст, ки барои паҳн кардани маводи маърифатӣ ва зиддитеррористӣ дар шабакаҳои интернетӣ таваҷҷуҳи махсус диҳанд.
Танҳо бо ҳамкории зичи оила, мактаб, давлат ва ҷомеа мо метавонем, ки кӯдакону наврасонро аз доми хоинони миллат ва терроризм ҳифз намоем ва наслҳои солим, худогоҳ ва ватандӯст ба воя расонем, зеро ҷавонони худогоҳ гарави сулҳу субот ва пешрафти Тоҷикистони азизи мо мебошанд.
Парвиз Саидзода,
сардори раёсати ташкил ва идораи имтиҳони
Маркази миллии тестӣ





