Душанбе, 6-уми апрели соли 2018
Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон дар таърихи 15.03.2018 мизи мудаввари «Ҷалби ҷавонон ба корҳои созандагӣ ва нақши он дар пешгирии ифротгароӣ»-ро ҷиҳати ба роҳ мондани корҳои таблиғотӣ бо мақсади ташаккули тафаккури зиддитеррористӣ дар байни аҳолӣ, ҳамчунин Нақшаҳои вобаста ба амалӣ намудани "Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои соҳои 2016-2020" баргузор намуд.
Дар кори Мизи мудаввари мазкур намояндагони Прокуратураи генералии Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Кумитаи ҷавонон ва варзиш, Кумитаи кор бо занон ва оилаи назди Ҳукумати Ҷумҳурии Тоҷикистон, Маркази тадқиқоти стратегии назди Президенти Ҷумҳурии Тоҷикистон, Маркази исломшиносии назди Президенти Ҷумҳурии Тоҷикистон, Маркази исломии Тоҷикистон ва Донишкадаи исломии Тоҷикистон ба номи Имоми Аъзам Абуҳанифа иштирок намуданд.
Мизи мудаввари мазкур бо ҳадафи ҷалби ҷавонон ба корҳои созандагӣ ва равишҳои беҳтару хубтару таъсиргузору оммафаҳм ба роҳ мондани хатари терроризм дар байни аҳолӣ, хусусан дар байни ҷавонон доир гардид.
Сухани ифтитоҳӣ ва ҳадафи чорабинии мазкур аз ҷониби муовини Раиси Кумита Мирзозода А.Ф. ироа гардид, ки дар он хатари терроризм ба сулҳу суботи кишвар ва роҳҳои пешгирии он, хусусан дар байни ҷавонон зикр шуд. Инчунин, муовини Раиси Кумита Олимзода Ф. аз фаъолияти Кумита дар ин самт гузориши муфассал дода, саҳми ҷавононро дар пешгирии ин омилҳои номатлуб муҳим арзёбӣ кард.
Ҳаким Абдуллоҳ Раҳнамо, сардори Раёсати таҳлил ва ояндабинии сиёсати хориҷии Маркази тадқиқоти стратегии назди Президенти Ҷумҳурии Тоҷикистон дар баромади худ роҷеъ ба амалишавии "Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои соҳои 2016-2020" изҳори андеша намуда, онро ҳамчун ҳуҷҷати муайянкунанда, роҳнамо ва самтдиҳанда дар мубориза алайҳи ифротгароӣ муҳим арзёбӣ намуд. Аҳамияти муборизаи иттилоотӣ ва саҳми он дар пешгирии ифротгароӣ баён гардида, зарурати таваҷҷуҳ ба ин самт ёдоварӣ карда шуд.
Номбурда зикр намуд, ки дар раванди татбиқи Стратегияи миллӣ ва муборизаи амалӣ бо экстремизму терроризм, такмили равиши корҳои иттилоотӣ ва фаҳмондадиҳӣ, аз ҷумла корҳои таблиғотии оммавӣ ва то сатҳи фаҳмиши мардуми оддӣ дар деҳот расонидани паёмҳои таблиғотӣ зарур мебошад. Дар ин самт иқдомҳое чун ироаи шарҳи осону оммафаҳми мафҳуму истилоҳоти соҳаи экстремизму терроризм, аз муҳити академикӣ ба муҳити оммаи мардум набаровардани ихтилофи назари олимон дар бораи таърифи мафҳумҳои экстремизму терроризм, истифода набурдани калимаҳои “динӣ” ва “исломӣ” ҳамчун сифат дар номи ин гурӯҳҳо ва муаррифии онҳо ҳамчун гурӯҳҳои террористии ғайриқонунӣ, дар раванди кори фаҳмондадиҳӣ дар байни аҳолӣ ҷалб намудани мутахассисони босалоҳият ва дорои маҳорати таблиғотӣ дар масоили мазкур, таъсиси Маркази омӯзиши равишҳои иттилоотӣ ва таблиғотии зиддиэкстремистӣ ва зиддитеррористӣ, баргузории курсҳои кӯтоҳмуддат барои омода кардани кадрҳо (лекторҳо) дар самти мубориза бо ифротгароӣ ва терроризм, нишон додани хатари бевоситаи он ба давлат ва миллат, ба сатҳи фардӣ фаровардани дарки хатари гурӯҳҳои экстремистӣ ва террористӣ барои шаҳрвандон, нишон додани таҳдиди он ба ҳуқуқу озодиҳо ва амнияти шахсию манфиати шахсии ҳар фард ва ғайра ҳамчун иқдомҳои зарурӣ номбар шуда, моҳияти ҳар яке аз ин иқдомҳо шарҳ дода шуд.
Суханронии мазкур дар умум, рӯи методу равишҳои фаҳмондадиҳӣ ва ин ки кормандони мақомоти сиёсию қудратӣ ва хизматчиёни давлатӣ ва ҳар як шаҳрванди оддии кишвар ба таври бисёр сода ва мушаххас хатари тафаккури ифротӣ ва гурӯҳҳои ифротгаро бидонаду дарк кунад, ҷараён гирифт.
Дар охири Мизи мудаввари мазкур пурсишу посух ва мулоҳизаҳо аз сӯи иштирокчиён, хусусан намояндагони Прокуратураи генералӣ, Кумитаи кор бо занон ва оила, Маркази исломшиносӣ, Маркази исломӣ, Донишкадаи исломӣ ва кормандони Кумита иброз гардиданд.
Бахши таҳсилоти динии Кумита
Бознашр аз сомонаи Кумитаи оид ба корҳои дин, танзими анъана ва ҷашну маросимҳои миллии назди Президенти Ҷумҳурии Тоҷикистон (http://din.tj/?q=node/761).
