Душанбе, 4-уми майи соли 2018
Дар замони муосир одамон имкониятҳои дастрасии иттилооти гуногун, аз ҷумла ахбори мазмуни динидоштаро доранд. Ва азбаски чунин иттилоот ба эътиқоду боварии мардуми мо алоқаманд аст, аз ин лиҳоз ҳини шиносоӣ бо он эҳтиёткор мебояд буд. Гузашта аз ин, на ҳама иттилооти динии гўё исломӣ ба эътиқоду боварии мусулмонон мувофиқат менамоянд. Барои иттилооти дурўғинро аз ахбори воқеӣ ҷудо кардан мо бояд дар бораи дини хеш маълумоти дурусту кофӣ дошта бошем.
Барои диндорону мазҳабдорон ва умуман ҷомеа хавфи бузург аз ҷониби сектаҳои ба ном Исломии дар олам паҳншуда таҳдид менамояд. Нисбат ба ин ҳар як аъзои ҷомеа набояд бефарқ бошад ва вазифадор аст, ки ба мусулмонон афкори иштибоҳангезу дурўғини ин гурўҳҳои сектантиро, ки худро исломӣ меноманд, ошкор ва фаҳмонда диҳад. Дар ин ҷода такя ба оятҳои Қуръон ва ҳадисҳои Паёмбар ва уламои дини Ислом намудан барои исботи ботилии ғояҳои сектаҳо қобили қабул аст.
Аҳли муслимин дар мавриди масоили динӣ бояд ботаҳаммул бошанд ва донишҳои диниро бояд аз мусулмони боварибахш ва уламои дин аз бар намоянд. Баъзе аз азҳоб ба масъалаҳои динӣ саҳлангорӣ менамоянд. Чунин ба назар мерасад, ки дар паси чунин муносибати ғаразноки сектантҳо ба мероси дини мусулмонӣ мақсади нопок ниҳон аст: диду назари хешро миёни мусулмонҳо паҳн намуда, онҳоро тарафдори ҳизби хеш гардониданӣ, онҳоро ба саркардаи худ тобеъ ва дар оянда барои иҷрои вазифаҳои сиёсии ҳизб сафарбар намуданианд.
Ҳукумати Тоҷикистон баҳри пешгирии хатар чораҳо меандешад, Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” рафтори ҷавонон ва роҳнамоии ҳидояткоронаи падару модаронро ба танзим медарорад.
Бинобар раванди ҷаҳонишавӣ, бархўрду муколамаи тамаддунҳо таъсири омилҳои беруна ба сохти ҳаёти ҷамъиятӣ, ба маорифи миллӣ беш аз пеш меафзояд. Ин амал ба вазъи динӣ-сиёсии ҷомеа низ метавонад, таъсир расонад. Сарвари давлатамон Эмомалӣ Раҳмон борҳо таъкид медоранд, ки таҳсили ҷавонон дар хориҷи кишвар бояд аз мавқеи манофеи амнияти миллату давлат сурат гирад. Ҳоло дар дохили кишвар имкониятҳо барои тайёр кардани уламои дин мавҷуданд. Дар раванди ҷаҳонишавӣ ин уламо бояд симои миллӣ дошта бошанду дастовардҳои илми муосирро бо ахлоқи миллӣ-динӣ пайванд карда тавонанд. Маҳз чунин нафарон метавонанд, дар пешгирӣ кардани раванди сиёсисозии Ислом ва радикализми динӣ шарики давлати дунявӣ бошанд.
Муҳиддин Алиев,
мутахассиси пешбари Кумита
Бознашр аз сомонаи Кумитаи оид ба корҳои дин, танзими анъана ва ҷашну маросимҳои миллии назди Президенти Ҷумҳурии Тоҷикистон (http://din.tj/?q=node/811).
