Душанбе, 28-уми марти соли 2018
Дар маҷлисгоҳи Маркази миллии тестии назди Президенти Ҷумҳурии Тоҷикистон бо иштироки кормандони Марказ ҷаласа баргузор гардид, ки рӯзномаи он масъалаҳои забони тоҷикӣ ва татбиқи Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон”-ро дар бар гирифта буд. Дар ҷаласа намояндаи Кумитаи забон ва истилоҳоти назди Ҳукумати Ҷумҳурии Тоҷикистон Зулфониён Раҳим Раҷабзода, сардори шуъбаи танзими истилоҳот, иштирок ва суханронӣ намуд.
Ҷаласаро Ҷаъфаров С.Ф., муовини аввали директори Марказ, ифтитоҳ карда, дар бораи масъалаи мубрами рӯз будани тадбиқи Қонуни Ҷумҳурии Тоҷикистон ”Дар бораи забони давлатии Ҷумҳурии Тоҷикистон” ҳарф зада, суханро ба Зулфониён Раҳим Раҷабзода дод.
Зулфониён Раҳим Раҷабзода, аз ҷумла қайд намуд, ки ҳар як миллатро дар тамоми ҷаҳон, пеш аз ҳама, бо забонаш мешиносанд ва қадр мекунанд. Кумитаи забон ва истилоҳоти назди Ҳукумати Ҷумҳурии Тоҷикистон пайваста кӯшиш менамояд, ки дар тамоми ташкилоту идораҳо, корхонаву муассисаҳо нисбат ба забони давлатӣ арҷгузорӣ карда шавад. Мутассифона, вазъи Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” имрӯз қаноатбахш нест. Кумитаи забон ва истилоҳоти назди Ҳукумати Ҷумҳурии Тоҷикистон барои нафъи камбудиҳо саъй мекунад, ки ҳамаи чораҳои дахлдорро андешад, вале ин мақом дар танҳоӣ наметавонад аз уҳдаи ҳамаи мушкилоти ҷойдошта барояд. Барои ин мебояд тамоми аҳли ҷомеа дастҷамъона талош варзанд.
Сипас, тибқи рӯзномаи маҷлис сардори шуъбаи кор бо муассисаҳои таҳсилоти миёна ва олии касбии Маркази миллии тестии назди Президенти Ҷумҳурии Тоҷикистон Шодиев Мирзошариф Сафарович дар мавзӯи “Решапайванди забони тоҷикӣ” маърӯза карда, оид ба таърихи забони тоҷикӣ ба ҳозирин маълумот дод. (Маърӯза замима мегардад).
