Душанбе, 20-уми майи соли 2026
20-уми майи соли 2026 дар дафтари асосии Маркази миллии тестии назди Президенти Ҷумҳурии Тоҷикистон вохӯрии намояндаи Прокуратураи генералии Ҷумҳурии Тоҷикистон бо роҳбарият ва кормандони Марказ баргузор гардид.
Дар вохӯри муовини якуми директори Марказ Шодиниё Абдулбосит Шодӣ, прокурори Маркази ягонаи иттилоотӣ оид ба пешгирии экстремизм, терроризм ва киберҷиноятҳои Прокуратураи генералӣ Ҳасанзода Умед Юсуфхон ва кормандони дафтари асосии Марказ иштирок доштанд. Ҳамзамон кормандони бахшҳои минтақавии Марказ дар шаҳру ноҳияҳои ҷумҳурӣ ба таври маҷозӣ дар ин вохӯрӣ иштирок доштанд.
Дар оғоз муовини якуми директори Марказ Шодиниё А. Ш. дар робита ба пешгирӣ ва коҳиш додани амалҳои дорои хусусияти экстремистию террористӣ суханронӣ карда, таъкид намуд, ки қабули Стратегияи нави пешгирии экстремизм, терроризм барои давраи то соли 2040 яке аз иқдомҳои муҳимми давлат дар самти ҳифзи амнияти миллӣ, суботи ҷомеа ва таъмини рушди устувори кишвар ба ҳисоб меравад. Ии санад бо дарназардошти вазъи мураккаби ҷаҳони муосир, таҳдидҳои нави иттилоотӣ, киберӣ ва идеологӣ таҳия гардидааст.
Дар Стратегия махсус таъкид шудааст, ки мубориза ва пешгирии экстремизм ва терроризм танҳои масъалаи мақомоти ҳифзи ҳуқуқ нест, балки масъалаи тамоми ҷомеа мебошад. Аз ҳамин хотир, дар амалисозии он мақомоти давлатӣ, ташкилоту муассисаҳои соҳаи маориф, дин, ҷомеаи шаҳрвандӣ, воситаҳои ахбори омма ва худи шаҳрвандон нақши муҳим доранд, – қайд кард Шодиниё А. Ш.
Сипас прокурори Маркази ягонаи иттилоотӣ оид ба пешгирии экстремизм, терроризм ва киберҷиноятҳои Прокуратураи генералӣ Ҳасанзода У. Ю. суханронӣ намуда, қайд кард, ки вазъи мураккабу ташвишовари минтақа ва ҷаҳон, шиддат гирифтани равандҳои геополитикӣ, таҳдиду хатарҳои муосир ба монанди тундгароиву экстремизм ва терроризм, қочоқи силоҳ ва гардиши ғайриқонунии маводди нашъаовар, киберҷиноятҳо ва ҷиноятҳои дигари муташаккили фаромиллӣ кишвари азизи моро низ бетараф нагузоштааст.
Таҷрибаи андӯхтаи ҷомеаи ҷаҳонӣ нишон медиҳад, ки экстремизм ва терроризм зуҳуроти тасодуфӣ набуда, на танҳо дар зеҳнияту тафаккури ашхоси алоҳида, балки дар ҷанбаҳои гуногуни ҳаёт, муҳит, муносибот, таълиму тарбия, фарҳанг, иҷтимоиёт, иқтисодиёт, таъсири берунӣ ва ғайра реша доранд. Бо дарки ин воқеият, Ҷумҳурии Тоҷикистон ҳадафҳои худро дар ин соҳа аз тариқи таҳия ва татбиқи стратегияҳои фарогири миллӣ тақвият дода, Стратегияи нави пешгирии экстремизм ва терроризм дар Ҷумҳурии Тоҷикистон барои давраи то соли 2040 ва Нақшаи чорабиниҳо оид ба амалисозии он дар солҳои 2026-2030 бо қарори Ҳукумати Ҷумҳурии Тоҷикистон аз 27 феврали соли 2026, № 73 тасдиқ карда шуд. Бояд зикр кард, ки тадбирҳои андешидаи давлату Ҳукумати Тоҷикистон дар ҳамоҳангӣ бо созмонҳои бонуфузи минтақавию байналмилалӣ, созмонҳои ғайридавлатӣ ва ҷомеаи шаҳрвандӣ натиҷаи мусбат дода, сол то сол сатҳи содиршавии ҷиноятҳои экстремистӣ ва террористӣ тамоюли камшавиро касб намудааст.
Дар анҷом муовини якуми директори Марказ Шодиниё Абдулбосит барои ҳамкориҳои судманду саривақтӣ ба прокурори Маркази ягонаи иттилоотӣ оид ба пешгирии экстремизм, терроризм ва киберҷиноятҳои Прокуратураи генералӣ Ҳасанзода Умед Юсуфхон изҳори миннатдорӣ кард.
