Душанбе, 22-юми июни соли 2016

21-уми июни соли 2016 дар маҷлисгоҳи Маркази миллии тестии назди Президенти Ҷумҳурии Тоҷикистон  бо иштироки котибони масъули қабули имтиҳонҳои эҷодӣ ва маҳорати махсус (ИЭММ)-и 13 муассисаи таҳсилоти миёна ва олии касбии дахлдори ҷумҳурӣ мизи мудаввар баргузор гардид.

Кормандони масъули Маркази миллии тестии назди Президенти Ҷумҳурии Тоҷикистон доир ба низоми гузаронидани ИЭММ, ҷамъбасти ИЭМ-2015 ва омодагиҳо ба ташкилу гузаронидани имтиҳонҳои мазкур дар соли 2016 баромадҳо намуданд.

Аз ҷумла зикр гардид, ки соли ҷорӣ дар 15 муассисаи таълимӣ барои дохил гаштан ба 34 ихтисос ИЭММ баргузор мегардад. Довталабон дар давраи асосии бақайдгирӣ 3 ихтисоси гурӯҳи ихтисосҳои якумро 1955 нафар ё 17%, 26 ихтисоси гурӯҳи ихтисосҳои сеюмро 3726 нафар ё 32%, 1 ихтисоси гурӯҳи ихтисосҳои чорумро 279 нафар ё 2% ва 4 ихтисоси гурӯҳи ихтисосҳои панҷумро 5762 нафар ё 49% интихоб намудаанд.

Бояд тзаккур дод, ки даври асосии имтиҳонҳои эҷодӣ ва маҳорати махсус бевосита аз тарафи комиссияҳои қабули муассисаҳои таълимии интихобнамудаи довталабон аз 25-уми июн то 5-уми июл ва имтиҳонҳои иловагӣ 7-8-уми июл дар макони ҷойгиршавии муассисаҳои таълимии интихобнамудаи довталабон гузаронида мешавад.