Душанбе, 26-уми июни соли 2024
25-уми июни соли 2024 дар маҷлисгоҳи муассисаи таълимии таҳсилоти миёнаи умумии № 65-и ноҳияи Шоҳмансур вохӯрии роҳбарияти Маркази миллии тестии назди Президенти Ҷумҳурии Тоҷикистон ва мақомоти дахлдори давлатӣ бо намояндагони ваколатдори ин ниҳод ва роҳбарони марказҳои имтиҳонӣ доир шуд.
Дар ҷаласа директори Маркази миллии тестӣ ва роҳбарияти Вазорати маориф ва илми Ҷумҳурии Тоҷикистон, намояндагони Прокуратураи генералии Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон ширкат карданд.
Дар аввал муовини якуми вазири маориф ва илми Ҷумҳурии Тоҷикистон Ҷӯразода Ҷамшед дар суханрониаш таваҷҷуҳи ҳозиринро ба он ҷалб кард, ки имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон, (ИМД) воқеан аз муҳимтарину намоёнтарин чорабинии ҳарсолаи соҳаи маорифи кишвар ба ҳисоб меравад ва ҳадафи ҷамъ омадани аҳли маҷлис низ баррасии масъалаҳои муҳимтарини марбут ба ин имтиҳонҳо аст.
Директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, муҳимтарин нуктаҳоро дар иртибот ба баргузории имтиҳонҳои мазкур ва дурусту бенуқсон роҳандозӣ кардани он барои намояндагони ваколатдори Марказ дар марказҳои имтиҳонӣ ва роҳбарони марказҳои имтиҳонӣ бозгӯӣ ва таъкид кард.
Ҷаъфарзода С. Ф. аз намояндагон ва роҳбарияти Вазорати маориф ва илми Ҷумҳурии Тоҷикистон, Прокуратураи генералии Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва намояндагони ваколатдори Маркази миллии тестӣ дар марказҳои имтиҳонӣ ва роҳбарони марказҳои имтиҳонии шаҳри Душанбе, ки он ҷо ҳузур доштанд, барои ҳамкориҳои судманд, мусоидаташон дар ташкилу роҳандозии ҳадафмандонаи ИМД ва самтҳои дигари фаъолияти Марказ сипосгузорӣ намуд. Ӯ аз ҷумла қайд кард, ки ИМД мавриди таваҷҷуҳи махсуси Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад ва Президенти кишвар барои шаффофу одилона ва дар сатҳи баланд ташкилу баргузор кардани ин имтиҳонҳо дастуру супоришҳои мушаххас медиҳанд.
Барои мувофиқи мақсаду талабот баргузор ва ҷамъбаст кардани ИМД-2024 шумо, намояндагони ваколатдор ва роҳбарони марказҳои имтиҳонӣ пеш аз ҳама, бояд вазифаю уҳдадориҳои худро донед. Сониян, дар иҷрои онҳо масъулияту ҷавобгарии худро комилан дарк карда, онҳоро бе камбуд ба иҷро расонида тавонед. Барои ҳар як корманди маркази имтиҳонӣ – аз фаррош то роҳбар ва намояндаи Марказ зарур аст, ки кор, вазифа, уҳдадорӣ, масъулияти худро бе ягон каму кост донад ва иҷро кунад, таъкид кард Ҷаъфарзода С. Ф.
Намояндагони Вазорати маориф ва илми Ҷумҳурии Тоҷикистон, Прокуратураи генералии Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон низ изҳори ақида карда, кормандони Марказро барои риояи комили тартиби муқарраргардидаи имтиҳонҳо, набаромадан аз чаҳорчӯбаи қонунҳои амалкунанда, муқовимат ба ҳама гуна амалҳои коррупсионӣ ва пешгирӣ аз онҳо ва амсоли ин таъкид намуданд.
