Душанбе, 15-уми марти соли 2024
14-уми марти соли 2024 мутахассисони Маркази миллии тестии назди Президенти Ҷумҳурии Тоҷикистон (Марказ) дар Мактаби маълумоти касбӣ ва давомдори Донишгоҳи Осиёи Марказӣ (ДОМ) дар шаҳри Душанбе бо шунавандагони курси тайёрии донишгоҳи мазкур вобаста ба имтиҳонҳои марказонидаи дохилшавӣ ба таври онлайн вохӯрӣ карданд.
Дар ин вохӯрӣ кормандони Марказ ба шунавандагони курси тайёрии ДОМ, ки дар шаҳри Хоруғи Вилояти Мухтори Кӯҳистони Бадахшон ҷойгир аст, дар бораи пешномнависӣ, давраҳои бақайдгирӣ, тарзи дурусти интихоби ихтисосҳо, раванди имтиҳонҳои қисми А (имтиҳон дар заминаи таҳсилоти умумӣ) ва қисми Г.2 (имтиҳонҳои иловагии тахассусӣ) барои дохил шудан ба ин Донишгоҳ маълумот доданд.
Зимни вохӯрӣ таъкид карда шуд, ки таълиму тарбияи наврасону ҷавонон зери таваҷҷуҳу ғамхориҳои доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, ба ин самт диққати аввалиндараҷа дода мешавад.
Хотиррасон мекунем, ки довталабоне, ки ихтисосҳоро аз ДОМ интихоб мекунанд, бар замми қисми А (имтиҳон дар заминаи таҳсилоти умумӣ), қисми Г (имтиҳонҳои иловагии тахассусӣ)-ро месупоранд. Қисми Г.2-ро ДОМ дар марказҳои имтиҳонии дар шаҳру ноҳияҳо таъсисдодааш баргузор мекунад.
Дар фарҷом шунавандагон ба мутахассисони Марказ вобаста ба имтиҳонҳои марказонидаи дохилшавӣ ва дигар мавзуъҳои марбут ба он савол дода, ба онҳо посухҳои мушаххас гирифтанд.
