Душанбе, 11-уми июли соли 2024

11-уми июли соли 2024 дар толори Маркази миллии тестии назди Президенти Ҷумҳурии Тоҷикистон (минбаъд: Марказ) ҷаласаи кормандони Марказ бо иштироки намояндаи Прокуратураи генералии Ҷумҳурии Тоҷикистон доир шуд. Ниҳоди мазкурро дар ин ҷаласа-вохӯрӣ полковники адлия Шарифзода Абдулфайёз намояндагӣ кард.

Ҷаласаро директори Марказ Ҷаъфарзода Сабзалӣ Файзалӣ ифтитоҳ карда, дар бораи рӯзномаи ҷаласа маълумот дод.

Намояндаи Прокуратураи генералии Ҷумҳурии Тоҷикистон полковники адлия Шарифзода Абдулфайёз аввалан тазаккур дод, ки дар асри ХХI инсоният бо хатарҳои зиёде рӯ ба рӯ гаштааст, ки терроризм ва экстремизм аз ҷумлаи онҳо аст. Экстремизм ва терроризм, ҳамчун хатари бузург ба амнияти миллии давлатҳо, аз ҷумла Ҷумҳурии Тоҷикистон таҳдид мекунад. Аудиторияи Марказ хеле бузург аст ва дар ин маврид метавонад барои пешгирӣ аз чунин зуҳуроти номатлубу харобиовар, нагаравидани аҳли ҷомеа, бахусус насли ҷавони мамлакат, ба он ба таври шоиста ҳиссагузор шавад.

Шарифзода Абдулфайёз қайд кард, ки Ҷумҳурии Тоҷикистон дар қатори кишварҳои дигари минтақа таҳдидҳои афзояндаи экстремизм ва терроризмро ба амнияти миллӣ ва рушди босуботи худ эҳсос менамояд. Бинобар ин Ҳукумати Ҷумҳурии Тоҷикистон барои мубориза бо ин вабои аср, пешгирӣ, ошкор, рафъ ва қатъ намудани зуҳуроти экстремизм ва терроризм чораҳои ниҳодӣ ва фарогир андешида, як қатор барнома ва қонунҳои дахлдор қабул намудааст. Аз ҷумла, “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025” мақсад, вазифаҳо ва самтҳои асосии сиёсати давлатии Ҷумҳурии Тоҷикистонро дар соҳаи муқовимат ба экстремизм ва терроризм муайян намудааст.

Муқовимат бо коррупсия низ аз самтҳои муҳимми сиёсати давлатии Ҷумҳурии Тоҷикистон аст, зеро фасоду ҳама гуна амалҳои коррупсионӣ монеаи рушди, эҷоди ҷиноятҳои гуногун ва боиси рукуди ҳар давлат аст. Дар партави сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҳукумати Ҷумҳурӣ ҷиҳати муқовимат ба коррупсия мунтазам чораҳои мақсаднокро роҳандозӣ намуда, барои ба вуҷуд овардани фазои зиддикоррупсионӣ заминаҳои ташкиливу ҳуқуқиро амалӣ мекунад. Қабули “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” аз чунин тадбирҳост, – аз ҷумла изҳор дошт Шарифзода Абдулфайёз.

Кормандони Марказро мебояд, ки ҳамчун намояндаи як ниҳоди бисёр пурнуфузи соҳаи маориф, ки доираи фаъолияти иттилоотию тарғиботиаш хеле пурвусъат аст,  бо истифода аз имкониятҳои созгор барои баланд бардоштани маърифати ҳуқуқии ҷомеа, хусусан ҷавонон, пешгирӣ аз ҳама гуна зуҳуроти аз лиҳози сиёсию мафкуравӣ барои давлату миллат хатарнок ҳиссагузорӣ кунед, – ахиран таъкид кард мавсуф.

Директори Марказ Ҷаъфарзода Сабзалӣ Файзалӣ қайд кард, ки яке аз зуҳуроти номатлуби замони имрӯз ва вабои аср, ки ба ҳаёти иҷтимоию иқтисодӣ ва сиёсии кишварҳои ҷаҳон таҳдид менамояд, экстремизм ва терроризм аст. Ҷумҳурии Тоҷикистон дар қатори кишварҳои дигари минтақа таҳдидҳои афзояндаи экстремизм ва терроризмро ба амнияти миллӣ ва рушди босуботи худ эҳсос менамояд. Бинобар ин Ҳукумати Ҷумҳурии Тоҷикистон барои мубориза бо ин вабои аср, пешгирӣ, ошкор, рафъ ва қатъ намудани зуҳуроти экстремизм ва терроризм чораҳои ниҳодӣ ва фарогир андешида, як қаттор барнома ва қонунҳои дахлдор қабул намудааст. Яке аз чунин санадҳои муҳим “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025” аст, ки бо фармони Президенти Ҷумҳурии Тоҷикистон аз 1-уми июни соли 2021, № 187 қабул гардидааст.

Тибқи Нақшаи амал оид ба амалисозии Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025 дар назди Марказ барои таъмини ҳамешагии шаффофияти равандҳо, ҷалби бештари ҷавонон ба таҳсилоти касбӣ тибқи тартиби муқаррарнамудаи Ҳукумати Ҷумҳурии Тоҷикистон ва ворид намудани тағйироту иловаҳо ба санадҳои меъёрии ҳуқуқии соҳаи маориф дар интиқолу барқарорсозии донишҷӯён вазифаҳо гузошта шудааст. Вобаста ба ин, Марказ ҷиҳати амалисозии вазифаҳои мазкур дар ҳамкорӣ бо Вазорати маориф ва илми Ҷумҳурии Тоҷикистон мунтазам чораҳо меандешад, ки аз ҷумлаи онҳо корҳои иттилоърасонӣ ва баргузории озмунҳои тақсимоти такрорӣ аст, – ­таъкид кард директори Марказ Ҷаъфарзода С. Ф.