Душанбе, 31-уми июни соли 2024
31-уми июни соли 2024 дар толори Маркази миллии тестии назди Президенти Ҷумҳурии Тоҷикистон вохӯрии кормандони дафтари асосии Марказ бо иштироки намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, подполковники адлия Розиқзода Алихон доир шуд. Дар ҷаласа кормандони бахшҳои минтақавии Марказ дар шаҳру ноҳияҳои Хоруғ, Хуҷанд, Панҷакент, Бохтар, Кӯлоб, Данғара ва Рашт ба таври маҷозӣ иштирок доштанд.
Дар оғоз директори Марказ Ҷаъфарзода Сабзалӣ Файзалӣ дар робита ба масъалаи амалҳои коррупсионӣ, ҳамчун зуҳуроти номатлуб ва пешгирӣ аз он суханронӣ намуд.
Намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Розиқзода Алихон зикр кард, ки аудиторияи Марказ хеле бузург аст ва бояд барои пешгирӣ аз чунин зуҳуроти номатлубу харобиовар ба таври ҳамешагӣ диққат дод.
Розиқзода Алихон қайд кард, ки Ҳукумати Ҷумҳурии Тоҷикистон барои мубориза бо ин вабои аср, пешгирӣ, ошкор, рафъ ва қатъ намудани ин амали нанговар чораҳои саривақтиву амалӣ андешида, як қатор барнома ва қонунҳои дахлдор қабул намудааст. Қабули “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” аз зумраи чунин тадбирҳост.
Муқовимат бо коррупсия аз самтҳои муҳимми сиёсати давлатии Ҷумҳурии Тоҷикистон аст, зеро фасоду ҳама гуна амалҳои коррупсионӣ монеаи рушд ва боиси рукуди ҳар давлат аст. Дар партави сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҳукумати Ҷумҳурӣ барои муқовимат ба коррупсия мунтазам чораҳои мақсаднокро роҳандозӣ намуда, бо мақсади ба вуҷуд овардани фазои зиддикоррупсионӣ заминаҳои ташкиливу ҳуқуқиро амалӣ мекунад.
Кормандони Марказро мебояд, ки ҳамчун намояндаи як ниҳоди бисёр пурнуфузи соҳаи маориф, ки доираи фаъолияти иттилоотию тарғиботиаш хеле васеъ аст, бо истифода аз имкониятҳои созгор барои баланд бардоштани маърифати ҳуқуқии ҷомеа, хусусан пешгирӣ аз ҳама гуна зуҳуроти аз лиҳози сиёсию мафкуравӣ барои давлату миллат хатарнок, ҳиссагузорӣ кунанд.
