Душанбе, 17-уми феврали соли 2016

Бо мақсади баррасии масъалаҳои омодагӣ ба давраи бақайдгирии довталабон барои иштирок дар имтиҳонҳои марказонидаи дохилшавӣ – 2016, корҳои иттилоърасонию таблиғотӣ дар бораи низоми имтиҳонҳои мазкур ва андешидани чораҳои зарурӣ барои дар сатҳи баланд доир кардани имтиҳонҳо дар Маркази миллии тестии назди Президенти Ҷумҳурии Тоҷикистон 10‑уми феврали соли 2016 вохӯрии кормандон бо ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Раҳмонзода Абдуҷаббор Азиз доир гардид.

Дар рафти вохӯрӣ ёрдамчии Президенти кишвар аз мақсаду вазифаҳои Марказ, дастгириҳои бевоситаи Президенти Ҷумҳурии Тоҷикистон, Асосгузори сулҳу ваҳдати миллӣ, Пешвои миллати тоҷик муҳтарам Эмомалӣ Раҳмон ва нуқтаҳои асосии Паёми имсолаи ӯ ба Маҷлиси Олии Ҷумҳурии Тоҷикистон,  ҳадафҳои Сарвари давлат дар мавриди баланд бардоштани сатҳу сифати таълим ёдовар шуд. Номбурда таъкид дошт, ки баҳои баланди Президенти кишвар нисбат ба фаъолияти Марказ дар посух аз кормандони он масъулияти бузург мехоҳад, аз ин рӯ, кормандони Марказро мебояд корҳоро дар ҳамаи самтҳои фаъолият боз ҳам ривоҷу равнақ бахшанд, то сазовори ин боварӣ бошанд.

Зимни вохӯрӣ ёрдамчии Президенти ҷумҳурӣ баён дошт, ки имтиҳонҳои марказонидаи дохилшавӣ дар зинаҳои гуногуни таҳсилот ҳам ба донишу маҳорати хонандагон ва ҳам ба фаъолияти омӯзгорон таъсири мусбат расонида, барои баланд бардоштани сифати таҳсилот заминаҳои мусоидро фароҳам меорад.

Аз ин рӯ, зарур аст, ки барои хуб омода шудан ба давраи бақайдгирии довталабон, боз ҳам таҳким бахшидани корҳои иттилоърасонию тарғиботӣ дар самти низоми имтиҳонҳои марказонидаи дохилшавӣ ва барои дар сатҳи баланд доир кардани имтиҳонҳо чораҳои зарурӣ андешида шаванд.

Дар охир вобаста ба масъалаҳои баррасишуда қарорҳои дахлдор қабул карда шуданд, ки барои иҷрои онҳо Марказ тадбирҳо меандешад.