Душанбе, 7-уми ноябри соли 2018

Бо мақсади фаҳмонидани хусусияту моҳияти низоми имтиҳонҳои марказонидаи дохилшавӣ тибқи фармоиши вазири маориф ва илми Ҷумҳурии Тоҷикистон аз 26-уми сентябри соли 2018, № 4803 ва нақшаи кории Маркази миллии тестии назди Президенти Ҷумҳурии Тоҷикистон ҷиҳати омодагӣ ба ИМД – 2019 аз 1-уми октябри соли 2018 дар давоми се моҳ (октябр, ноябр, декабр) дар муассисаҳои таълимии таҳсилоти умумии асосӣ, миёнаи умумӣ, ибтидоии касбӣ  ва миёнаи касбӣ бо алоқамандони имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ вохӯриҳо доир мегардад. Ҳадаф аз суҳбату вохӯриҳо, ки бо иштироки кормандони Маркази миллии тестии назди Президенти Ҷумҳурии Тоҷикистон роҳандозӣ мегардад, ба довталабон ва дигар алоқамандони низоми ИМД фаҳмонидани хусусияту моҳияти низом, тавсияҳо барои интихоби дурусти ихтисосҳо мебошад. Тибқи фармоиши мазкур барои ташкилу баргузории вохӯриҳо муассисаҳои таълимӣ чораҳо андешида, шароити заруриро фароҳам меоваранд.

Вохӯриҳо дар асоси муаррифии ягонаи компютерӣ ташкил карда шуда, дар баробари хонандагони синфҳои 9-ум, 11-ум ва хатмкунандагони литсей ва колеҷҳо иштироки омӯзгорон ва падару модарон низ дар назар аст.

Бояд қайд намуд, ки дар давоми 3 моҳ дар 710 муассисаи таълимии 34 шаҳру ноҳияи ҷумҳурӣ 620 вохӯрӣ ба нақша гирифта шудааст. Ба иштирокдорони вохӯриҳо, дар баробари маърӯзаҳо, дар асоси маводи ёрирасон тарзи дуруст интихоб кардан, ҷо ба ҷо гузоштан ва дуруст дарк кардани моҳияти касбу ихтисосҳо дарсҳои амалӣ гузаронида мешавад.