Душанбе, 8-уми августи соли 2025
8-уми августи соли 2025 дар дафтари асосии Маркази миллии тестии назди Президенти Ҷумҳурии Тоҷикистон вохӯрии роҳбарият ва кормандони Марказ бо намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон баргузор гардид.
Дар вохӯрӣ сарнозири Раёсати муқовимат бо коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Розиқзода Алихон, муовини якуми директори Марказ Шодиниё Абдулбосит, кормандони дафтари асосии Марказ ва бахшҳои минтақавии Марказ дар шаҳру ноҳияҳои Хоруғ, Хуҷанд, Панҷакент, Бохтар, Кӯлоб, Данғара ва Рашт ба таври маҷозӣ иштирок доштанд.
Дар оғоз муовини якуми директори Марказ Шодиниё Абдулбосит дар робита ба амалҳои коррупсионӣ, ҳамчун падидаи номатлуб суханронӣ ва таъкид намуд, ки имрӯзҳо коррупсия мавзуи доғи рӯз гардидааст ва ин падида ба барҳам задани бовари ҷомеа ва аҳолӣ ба ниҳодҳои давлатӣ, паст шудани сифати зиндагии мардум, боздоштани рушди иқтисоди кишвар ва халалдор шудани низоми қонунӣ дар давлатҳо оварда мерасонад.
Мубориза бо коррупсия кори як ниҳод набуда, барои пешгирӣ аз ин падидаи хатарноку нангин бояд мо дар якҷоягӣ фаъолият намуда, баҳри коҳиш додани он саҳмгузор бошем, афзуд Шодиниё А. Ш.
Сипас, сарнозири Раёсати муқовимат бо коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Розиқзода Алихон оид ба татбиқи “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030”, санадҳои маъёрии ҳуқуқии дигари танзимкунандаи соҳа суханронӣ карда, барои пешгирии ҳолатҳои мусоидаткунанда ба амалҳои коррупсионӣ пешниҳодҳои мушаххас намуда, вобаста ба риояи талаботи конунгузорӣ ва татбиқи дурусти Методологияи тартиб ва методикаи гузаронидани таҳлили фаъолият (хавфҳои коррупсионӣ), ки бо қарори Ҳукумати Ҷумҳурии Тоҷикистон аз 28 октябри соли 2016, № 465 тасдиқ гардидааст, ба ҳозирин маълумот пешниҳод намуд.
Розиқзода Алихон таъкид кард, ки барои ташкили вохӯрӣ бо намояндагони Агентӣ бо ташаббуси Марказ, тарғибу ташвиқи зиддикоррупсионӣ берун аз Марказ, пешгирӣ аз ҳолатҳои қаллобӣ дар робита ба фаъолияти Марказ, таҳияи нақшаи корҳои тарғиботию ташвиқотии зиддикоррупсионӣ, ҷоннок намудани фаъолияти комиссияи дохилиидоравӣ вобаста ба эскпертизаи зиддикоррупсионии санадҳои меъёриву ҳуқуқӣ ва гузоштани маводди дахлдор дар сомонаи Марказ чораҷӯӣ карда шавад.
Дар анҷом муовини якуми директори Марказ Шодиниё Абдулбосит барои ҳамкориҳои судманду саривақтӣ ба намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон изҳори миннадорӣ намуд.
