Душанбе, 22-юми декабри соли 2017

21-уми декабри соли 2017 бо ташаббуси Маркази миллии тестии назди Президенти Ҷумҳурии Тоҷикистон дар маҷлисгоҳи Марказ ҷаласаи муштараки Маркази миллии тестии назди Президенти Ҷумҳурии Тоҷикистон ва муассисаҳои таълимии таҳсилоти миёна ва олии касбии ҷумҳурӣ доир гардид. Дар он масъалаҳои марбут ба  имтиҳонҳои эҷодӣ ва маҳорати махсус, ки вобаста ба баъзе ихтисосҳо дар доираи имтиҳонҳои марказонидаи дохилшавӣ ба ин муассисаҳои таълимӣ дар соли 2018 супориданашон талаб карда мешавад, баррасӣ гардид.

Ҷаъфаров С. Ф, муовини аввали директори Маркази миллии тестии назди Президенти Ҷумҳурии Тоҷикистон баромад намуда, ҳадафи баргузории маҷлисро баён кард.

Сипас сардори шуъбаи кор бо муассисаҳои таълимии таҳсилоти миёна ва олии касбӣ Шодиев М. С. иштирокдоронро бо хулосаи таклифу пешниҳодҳои муассисаҳои таълимӣ, ки оид ба низоми баргузории имтиҳонҳои эҷодӣ ва маҳорати махсус ба унвони Марказ фиристода буданд, шинос намуд.

Дар вохӯрӣ, ки такмили низоми ташкил ва гузаронидани имтиҳонҳои эҷодӣ ва маҳорати махсус ҳангоми дохил шудан ба муассисаҳои таълимии таҳсилоти миёна ва олии касбӣ баррасӣ гардид, намояндагони масъули ҳамаи 20 муассисаҳои таълимии таҳсилоти миёна ва олии касбӣ иштирок намуда, мубодилаи афкор карданд.

Дар охир қарорҳои дахлдор қабул гардид. Аз ҷумла, таъкид шуд, ки таклифу пешниҳодҳои муассисаҳои таълимӣ, ки барои самаранок ва босифат гузаронидани имтиҳонҳои эҷодӣ ва маҳорати махсус мусоидат менамояд, барои баррасӣ ҷиҳати ворид намудани тағйироту иловаҳо ба “Тартиби баргузории имтиҳонҳои эҷодӣ ва маҳорати махсус барои дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон тавассути имтиҳонҳои марказонидаи дохилшавӣ” (бо фармоиши №3836 аз 12.10. сол 2016 тасдиқ шудааст) ба Вазорати маориф ва илми Ҷумҳурии Тоҷикистон пешниҳод гардад.