Душанбе, 7-уми августи соли 2018
6-уми августи соли 2018 дар толори Вазорати маориф ва илми Ҷумҳурии Тоҷикистон вохӯрӣ бо котибони масъули комиссияҳои қабули муассисаҳои таълимии таҳсилоти миёна ва олии касбӣ баргузор гардид.
Дар вохӯрӣ Нуриддин Саид – вазири маориф ва илми Ҷумҳурии Тоҷикистон, Давлатзода Сайфиддин – муовини вазир, Хуршед Икромӣ – директори Маркази миллии тестии назди Президенти Ҷумҳурии Тоҷикистон, сардорони раёсату шуъбаҳои дахлдори вазорат ва Марказ, инчунин, котибони масъули комиссияҳои қабули муассисаҳои таълимии таҳсилоти миёна ва олии касбӣ иштирок намуданд.
Мавзӯи асосии вохӯрӣ марҳалаи тақсимоти донишҷӯён ва қабули ҳуҷҷатҳои донишҷӯён дар муассисаҳои таълимии таҳсилоти миёна ва олии касбӣ буда, зимни қабули ҳуҷҷатҳо роҳ надодан ба ҳолатҳои коррупсионӣ, риоя намудани одоби муошират бо довталабон ва амсоли инҳо мавриди баррасӣ қарор гирифтанд.
Вохӯриро вазири маориф ва илми Ҷумҳурии Тоҷикистон Нуриддин Саид оғоз намуда, аз ҷумла, таъкид кард, ки қабули ҳуҷҷатҳо дар муассисаҳои таълимии таҳсилоти миёна ва олии касбӣ аз ҷониби котибони масъул ҳамарӯза бояд аз соати 7:00-и субҳ оғоз ёфта, дар давоми рӯз дархости тамоми довталабон бояд баррасӣ карда шавад. Инчунин, ба роҳбарони муассисаҳо ва котибони масъул дастур дода шуд, ки бо дарназардошти вазъияти молиявии довталабоне, ки имкони пардохти пурраи маблағи таҳсили солонаро якбора надоранд, ба таври истисно барои давра ба давра пардохт намудани маблағи таҳсил ва қабули ҳуҷҷатҳои онҳо иҷозат дода шавад.
Сипас директори Маркази миллии тестии назди Президенти Ҷумҳурии Тоҷикистон Хуршед Икромӣ суханронӣ намуда, таъкид кард, ки ҳар як муассисаи таълимии таҳсилоти миёна ва олии касбӣ то 20-уми август бояд нусхаи дуюми рӯйхати донишҷӯшударо ба Марказ равона созанд ва ба довталабоне, ки бо сабабҳои гуногун барои супоридани ҳуҷҷатҳои хеш ба муассисаҳои таълимӣ худ бевосита ҳозир шуда наметавонанд, котибони масъул иҷозат диҳанд, ки падару модарони онҳо ҳуҷҷатҳояшонро супоранд.
