Таҳнияти директори Маркази миллии тестии назди Президенти Ҷумҳурии Тоҷикистон ба мардуми Тоҷикистон ба муносибати Рӯзи Ваҳдати миллӣ
Барои саодати ҳар халқу миллат вуҷуди ду омили муҳимтарин зарур аст: истиқлол ва ваҳдат. Аммо аз ин ду омил яке боз ҳам мубраму муҳимтар аст: ВАҲДАТ. Дар байни ҳар ҷомеае, ки ваҳдат пойдор набошад, аҳли он ҷамъият ҳеҷ гоҳе ба саодату ободию озодӣ даст намеёбад. Дар ҳолати инҳоро соҳиб шудан ҳам, онро бидуни ваҳдат дер нигоҳ дошта наметавонад.
Ваҳдати миллӣ иттиҳоду сарҷамъӣ, ягонагӣ, ҳамдигарфаҳмии як халқ ва ё миллат, тамоми қишру ниҳод ва неруҳои ҷамъият дар кору афкор ва созандагиву бунёдкорӣ баҳри ободонию рушди ватан, ҳифзи истиқлоли кишвар аст.
Бояд донем, ки мафҳуми «миллат» танҳо ягонагии марзию этникӣ, яъне, масалан, ваҳдати танҳо тоҷикон нест, балки ваҳдати миллӣ, ба таври дигар, тарҷеҳ додани манфиатҳои миллӣ бар манфиатҳои шахсию гурўҳӣ ва амсоли инҳост, чунки ҳеҷ яке аз манофеи хусусӣ ё гурўҳӣ дар алоҳидагӣ берун аз доираи манфиатҳову арзишҳои миллӣ вуҷуд дошта наметавонад.
Воқеан, иттиҳоди миллӣ неъмати бузургу қудсиест, ки кулли комёбиҳо ва саодати рӯзгори мардум аз он сарчашма мегирад. Ин неъмати воло боиси таҳкими давлат, рушди мамлакат аст.
Ваҳдати миллӣ, бахусус барои миллати куҳанбунёду соҳибтамаддуни мо, дар баробари забони модарӣ ва дигар рукнҳои давлатдориамон, нақши тақдирсоз дорад, аз ин рӯ, басо азиз аст. Зеро маҳз бо пойдории сулҳу ваҳдати миллӣ хатари пароканда шудани миллати тоҷик, пора гардидану барҳам хӯрдани давлати тозаистиқлоли тоҷикон аз байн рафт.
25 сол қабл, баъд аз ҷангу муноқишаҳои даҳшатноку тӯлонии миллаткуш, баъди музокироти сангину мадид оқибатуламр бо имзои санади тақдирсоз − Созишномаи умумии истиқрори сулҳ ва ризоияти миллӣ дар Тоҷикистон ба раванди оштии миллӣ, ваҳдати саросарии миллии тоҷикон поя гузошта шуд.
Барои ба даст овардани ин сулҳи пойдор, барои дастёбӣ ба ваҳдати миллӣ, ки зиндагии осоиштаи мо самари он аст, саҳму талош, ҷасорати сиёсию садоқати миллии Президенти Ҷумҳурии Тоҷикистон муҳтарам Эмомалӣ Раҳмон хеле зиёд аст.
Ҳар яки моро мебояд, чун шаҳрванди худсозу худшинос, дастоварди нодиру таърихии халқамон, яъне ваҳдати миллиро ҳифз кунем, ин амну осоишу оромиш, ин ҷомеаи озоди шаҳрвандиро арҷгузорӣ кунем, ба қадри ин ҳама неъматҳо бирасем, истиқлоли давлатию ваҳдати миллиамонро бо кору пайкору афкорамон сидқан ҳимояту ҳифозат намоем ва баҳри рушди рӯзафзуни кишвари маҳбубамон дастҷамъона талош биварзем, худро ҳамтақдиру ҳаммароми миллати хеш донем ва аз неъмати бузурги Ватану ватандорӣ ифтихор намоем.
Ҳама мардуми шарифи Тоҷикистонро бо ин ҷашни барои миллат таърихию фараҳафзо – бо рӯзи Ваҳдати миллӣ табрику шодбош мегӯям. Орзумандам, ки дар самои софи сулҳу салоҳи Тоҷикистони азиз ҳеҷ гоҳе абри ҷангу нифоқ набошад ва хуррамию комёбию саодати абад ёри ҳама тоҷикон ва тоҷикистониёни арҷманд бошад!
Идатон муборак бодо, ҳамватанони гиромӣ!
Бо эҳтироми самимӣ:
Ҷаъфарзода Сабзалӣ Файзалӣ, директори Маркази миллии тестии назди Президенти Ҷумҳурии Тоҷикистон
