Душанбе, 29‑уми июли соли 2022

Маркази миллии тестии назди Президенти Ҷумҳурии Тоҷикистон барои довталабоне, ки ба тақсимоти асосии довталабон (натиҷаҳои он 25‑уми июл эълон гардид) роҳ ёфта, лекин дар тақсимоти мазкур аз рӯйи ҳеҷ яке аз комбинатсияҳои ихтисосҳои интихобкардаашон комёб нагардиданд, озмуни тақсимоти такрорӣ мегузаронад.

Барои иштирок дар ин озмун довталабони мазкурро зарур аст, ки аз 12‑ум то 15-уми август дар нуқтаи бақайдгирӣ ҳозир шуда, бо пешниҳоди ҳуҷҷати тасдиқкунандаи шахсият, варақаи бақайдгирӣ ё даъватнома ва рақами расид аз филиали Бонки давлатии амонатгузории Ҷумҳурии Тоҷикистон “Амонатбонк” оид ба пардохти маблағи иловагӣ худро аз нав номнавис кунанд.

Бо мақсади пешгирӣ аз амалҳои номатлуб ва фирефтаи қаллобон нашудани довталабон таъкид менамоем, ки озмуни тақсимоти такрорӣ низ, чун озмуни тақсимоти асосӣ, тавассути барномаи махсуси компютерӣ анҷом дода мешавад ва дар ин раванд низ ҳеҷ омили инсонӣ таъсир расонида наметавонад. Инчунин, бояд таъкид кард, агар довталабон ҳангоми азнавбақайдгирӣ комбинатсияҳои ихтисосҳоро бо дарназардошти сатҳи омодагии худ (натиҷаи имтиҳонсупориашон) ва интихоби дурусту мувофиқи ихтисосҳо дар рӯйхат ҷо ба ҷо кунанд, эҳтимолияти дар озмуни тақсимоти такрорӣ комёб шудани аксарият – қариб ҳамаи онҳо хеле зиёд аст.

Бори дигар таъкид менамоем, ки ҳеҷ кас ва ҳеҷ чиз ба натиҷаҳои озмуни тақсимоти такрории довталабон таъсире расонида наметавонад. Вобаста ба ин, аз довталабон ва падару модарон хоҳишмандем, ки дар ин масъала ҳушёру боэҳтиёт бошанд ва ба доми фиребу ваъдаҳои қаллобон наафтанд.

Дар озмуни тақсимоти такрорӣ низ балҳои қаблан бадастовардаи довталабон ба назар гирифта мешавад.

Маълумоти муфассал дар бораи азнавбақайдгирӣ барои иштирок дар озмуни тақсимоти такрорӣ дар сомонаи Марказ баъдан ҷой дода хоҳад шуд.