Душанбе, 25-уми июни соли 2016
Бо мақсади таъмини ҳуқуқҳои шахсӣ ба арзёбии воқеӣ (объективӣ) ва ҳалли масъалаҳои баҳсталаби марбут ба тартиби гузаронидан ё натиҷаҳои имтиҳонҳо ба довталаб ҳуқуқи дар шакли хаттӣ додани аризаи апеллятсионӣ дар бораи вайрон кардани тартиби муқарраргардида ва (ё) норозӣ будан аз натиҷаи имтиҳонҳо дода мешавад.
Аризаи апеллятсионӣ ин аризаи хаттии асосноккардаи довталаб (1) дар бораи вайрон кардани тартиби муқарраргардидаи баргузории имтиҳонҳои марказонидаи дохилшавӣ ва (ё) (2) дар бораи норозӣ будан аз холҳои гузошташуда дар имтиҳонҳои марказонидаи дохилшавӣ мебошад, ки тибқи тартиби муқарраркардаи ин Низомнома баррасӣ карда мешавад.
Аризаи апеллятсионӣ дар бораи вайрон кардани тартиби муқарраргардидаи баргузории имтиҳонҳои марказонидаи дохилшавӣ рӯзи имтиҳон то баромадан аз маркази имтиҳонӣ ба номи роҳбари маркази имтиҳонӣ пешниҳод карда мешавад.
Аризаи апеллятсионии довталаб дар бораи вайрон кардани тартиби муқарраргардидаи баргузории имтиҳонҳои марказонидаи дохилшавӣ дар ҳолатҳои вайрон кардани муқаррароти танзимкунандаи расмиёти баргузории имтиҳонҳо, ки ба натиҷаи имтиҳон(ҳо) таъсири манфӣ мерасонад, барои баррасӣ қабул карда мешавад.
Агар тартиби баргузории имтиҳонҳо вайрон карда шавад, довталаб дар ин бора аризаи апеллятсиониро дар рӯзи имтиҳон аз маркази имтиҳонӣ набаромада пешниҳод менамояд.
Шакли аризаи апеллятсионӣ дар бораи вайрон кардани тартиби муқарраргардидаи баргузории имтиҳонҳои марказонидаи дохилшавиро, ки Марказ онро муқаррар менамояд, ба довталаб тибқи дархосташ роҳбари маркази имтиҳонӣ медиҳад.
Довталаб шакли аризаи апеллятсионӣ дар бораи вайрон кардани тартиби муқарраргардидаи баргузории имтиҳонҳои марказонидаи дохилшавиро пур карда, ба роҳбари маркази имтиҳонӣ месупорад. Роҳбари маркази имтиҳонӣ уҳдадор аст, ки довталабро аз муҳлати баррасӣ ва пешниҳоди натиҷаи баррасии аризаи апеллятсионӣ огоҳ намояд.
Комиссияи апеллятсионӣ хулосаи комиссияи кории маркази имтиҳонӣ ва маводи дахлдорро баррасӣ намуда, (1) дар сурати қонеъ гардонидани аризаи апеллятсионӣ қарор қабул менамояд, ки натиҷаи имтиҳони довталаб аз эътибор соқит дониста, ба ӯ дар имтиҳонҳои иловагӣ имконияти супоридани имтиҳони дахлдор дода шавад; (2) дар сурати беасос донистани даъвои довталаб қарор қабул менамояд, ки аризаи апеллятсионии довталаб рад карда шуда, натиҷаи имтиҳони ӯ қобили қабул дониста шавад.
Натиҷаҳои баррасӣ ва қарори қабулшуда бо протоколи баррасии аризаи апеллятсионӣ дар бораи вайрон кардани тартиби муқарраргардидаи баргузории имтиҳонҳои марказонидаи дохилшавӣ, ки шакли онро Марказ муқаррар менамояд, ба расмият дароварда мешавад.
Комиссияи апеллятсионӣ довталаб ё намояндаи қонунии ӯро аз қарори қабулкардаи комиссияи апеллятсионӣ огоҳ месозад.
