Душанбе, 20-уми марти соли 2024
20-уми марти соли 2024 дар толори Маркази миллии тестии назди Президенти Ҷумҳурии Тоҷикистон (Марказ) ба муносибати таҷлили ҷашни Наврӯзи байналмилалӣ бо иштироки кормандони Марказ ва бахшҳои минтақавӣ (бархат) ҷамъомади идона баргузор шуд
Ҷаъфарзода Сабзалӣ, директори Марказ, кормандонро бо фарорасии ҷашни қадимаи Наврӯз ва эҳёи табиат шодбош гуфта, ёдоварӣ аз он кард, ки маҳз бо заҳмату талошҳо ва сиёсати фарҳангпарваронаи Президенти Ҷумҳурии Тоҷикистон муҳтарам Эмомалӣ Раҳмон Наврӯз ҳамчун ҷашни байналмилалӣ аз ҷониби Маҷмаи умумии Созмони Милали Муттаҳид пазируфта шуд ва ин баёнгари он аст, ки миллати тоҷик аз замони бостон то имрӯз бо хулуси ният ва ормони олӣ падидоварандаи ҷашне будааст, ки паёми ваҳдату муҳаббат, покию садоқат, зебоию нафосат, хираду заковат, ростию адолат ва кӯшоиву меҳнат меорад.
Ба шарофати истиқлоли давлатӣ эҳё гардидани Наврӯз дар Тоҷикистон, шукӯҳи тоза пайдо кардану ба яке аз ҷашнҳои бузургу муқаддаси миллии мардуми тоҷик табдил ёфтан ва болотар аз ин, мақоми ҷаҳонӣ гирифтани он ҳам гувоҳи азамати Наврӯз асту ҳам нишони бузургии миллати тамаддунсози тоҷик. Ин ҷашни куҳан сол то сол нуфузи бештар касб карда истодааст, – афзуд дар идомаи суханаш директори Марказ.
Наврӯз, чунонки Президенти Ҷумҳурии Тоҷикистон муҳтарам Эмомалӣ Раҳмон гуфтаанд: “пайки шодиву сурур, шукуфоиву зебоӣ, оғози кишту кори баҳорӣ, паёми эҳёи табиат аст, ки гардише дар руҳу ҷони одамон падид меоварад”. Наврӯз на танҳо иди баҳору зебоӣ, оғози соли нави аҷдодӣ, балки тарғибгари суннатҳои воло ва фарҳанги ғании ниёгонамон низ мебошад, чунки маҳз суннатҳои ахлоқӣ ва фарҳанги таърихии халқ, ҳикмату қудрати Наврӯз халқи моро дар марҳалаҳои ҳассоси зиндагӣ ба ягонагӣ, ору номус ва ватандӯстдорӣ ҳидоят мекунад, – тазаккур дод Ҷаъфарзода С.
Дар ҷаласаи идона чанде аз кормандони Марказ дар бораи таърихи ҷашни Наврӯз, аҳаммияти фарҳангию иҷтимоию таърихию миллӣ, анъанаҳои неки ин иди миллии тоҷикон ва паҳлуҳои дигари он изҳори андеша карданд.
Дар охир ба як қатор кормандони Марказ сипоснома тақдим гардид.
