Парчам аз замонҳои бостон ҳамчун яке аз рамзҳои муҳимтарини давлатдорӣ ҳисобида мешуд. Он баёнгари арзишмандтарин нишонаҳои фарҳанги ҳар як халқу миллат, масири таърихии сипарикарда ва рамзи истиқлоли ҳар давлат аст.
Дар ҷаҳони муосир доштани парчами миллӣ нишони истиқлол, яке аз рамзҳои асосии давлатдорӣ ва ваҳдати миллӣ мебошад, яъне давлати муосир тавассути парчами он муаррифӣ мегардад.
Парчами миллии тоҷикон намоде аз таърихи чандинҳазорсолаи он ва давлату давлатдориаш мебошад. Мо, тоҷикон, тибқи маъхазҳои таърихӣ, ҳамчун поягузорони тамаддуни башарӣ дорои собиқаи хеле қадими парчамдорием ва оини парчамсозиву парчамдориро арҷ мегузоштем. Парчам рамзи ваҳдату иттиҳоду ягонагӣ ва ҳамдилию сарҷамъии халқу миллатамон буд.
Баробари рамзҳо ва муқаддасоти дигари давлат – Конститутсия, Нишони давлатӣ, Суруди миллӣ ва асъори миллӣ Парчами давлатии Ҷумҳурии Тоҷикистон дар шакли кунунӣ ҳамқадами соҳибистиқлолии кишвар аст. Он чун як нишонаи давлати соҳибистиқлолу мустақил дар Иҷлосияи XVI Шӯрои Олии Ҷумҳурии Тоҷикистон 24-ноябри соли 1992 тасдиқ карда шудааст.
Месазад ёдоварӣ кард, ки ҷараёни қабулу тасдиқи Парчами давлатии Ҷумҳурии Тоҷикистон дар вазъият ва давраи хеле ҳассоси сиёсии мамлакат, дар замоне ба вуқуъ омад, ки миллат ва давлати тоҷиконро хавфи нобудӣ таҳдид мекард. Хушбахтона, бо талошу кӯшишҳои Роҳбари хирадманди тозаинтихоби Ҷумҳурӣ муҳтарам Эмомалӣ Раҳмон дар ҷодаи қабули рамзҳои давлатӣ ва муқаддасоти миллӣ, аз ҷумла Парчам ва ба ин восита муттафиқ кардани ҷонибҳои даргир қадамҳои устувор гузошта шуд. Пазиришу қабули Парчам, дар баробари дигар муқаддасоти миллӣ, василае гардид барои муттаҳидии мардуми пароканда ва оғози корҳои барқарорсозию бунёдкорӣ дар мамлакат.
Парчами миллии мо рамзи ҳувияту худогоҳӣ, нишони озодию истиқлоли халқи тамаддунпарвару куҳанбунёди тоҷикон ва ҳастии миллат ба ҳисоб меравад. Он шаҳодат аз устувории пояи иттиҳоду ваҳдат ва якдилии сокинони кишвар дода, баёнгари шукӯҳу шаҳомат, ифтихору манзалат ва нангу ори халқу миллати барӯманди мост. Парчами давлатии Ҷумҳурии Тоҷикистон, ки симои давлат аст, дар мо эҳсоси ватандорӣ ва муҳаббат ба онро бедор ва поянда медорад.
Эҳтироми Парчами миллӣ эҳтиром нисбат ба миллат, таърих ва муқаддасоти дигари давлатист. Бо мақсади гиромидошти Парчами миллӣ, ҳамчун яке аз муқаддасоти миллӣ ва рамзи давлатдорӣ 19-уми ноябри соли 2009 ба Қонуни Ҷумҳурии Тоҷикистон «Дар бораи рӯзҳои ид» тағйирот ворид гардида, 24-уми ноябр ҳамчун Рӯзи Парчами давлатии Ҷумҳурии Тоҷикистон эълон шуд. Таҷлили рӯзи Парчами миллӣ арҷгузорӣ аз муқаддасоти миллӣ, ифтихори давлатдорӣ ва ватандорӣ маҳсуб меёбад.
Аз қабули Парчами давлатии Ҷумҳурии Тоҷикистон имсол 30 сол ва аз таҷлили расмии Рӯзи Парчам (аз соли 2009) 13 сол сипарӣ мешавад. 13 сол аст, ки тоҷикистониён бо шукргузорӣ аз амну ваҳдату офияти кишвар ва бо суруру шодмонӣ Рӯзи Парчами давлатии Тоҷикистонро мутантан ҳамчун гиромидошти яке аз рамзҳои асосии давлатдорӣ таҷлил мекунанд. Акнун рӯзи таърихӣ – Рӯзи Парчами давлатӣ дар кишварамон ба ҷашни нави миллӣ табдил ёфтааст.
Кунун халқи шарафманду сарбаланди тоҷик зери Парчами давлати худ муттаҳид гардида, барои устувории истиқлоли давлатӣ, ҳифзи якпорчагӣ ва сулҳу амният мамлакат кору пайкор мекунанд.
Мо бо ин Парчам ифтихормандем. Бигзор, ин Парчам то абад дар фазои амну сулҳу салоҳу хуррамӣ пойдор бимонад! Мо, тоҷикон ва тоҷикистониёнро мебояд чун фарзандони як миллати шарафманд, оини парчамдорӣ ва ҳисси эҳтиромамонро нисбат ба Парчам – ин нишону рамзи муҳими давлатдорӣ тақвият бахшем, дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар боби арҷгузорию эҳтироми муқаддасоти миллӣ, муҳаббат ба Ватан ва хидмати сазовор ба он ҳамеша дар ёд дошта, сармашқи кори худ намоем.
Ҳамватанони азизро ба муносибати солгарди Рӯзи Парчами давлатии Ҷумҳурии Тоҷикистон самимона таҳният мегӯям. Орзумандам, ки халқи маҳбубам дар зери ливои давлаташ ҳамеша муттаҳиду якдилу ҳамандеш бошад ва ба рӯзгори босаодату ҳаёти хуррам даст ёбад. Таманно дорам, ки дар фазои сулҳу осоиш рушди босуботи иҷтимоию иқтисодии кишварамон таъмин гардад ва мардуми сарфарози тоҷик аз ҳама гуна офату нохушиҳо дар амон бошад.
Рӯзи Парчами давлатӣ муборак бод, ҳамватанони гиромӣ!
