Душанбе, 5-уми октябри соли 2018
Бо ташаббуси Комиссия оид ба татбиқи Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” дар маҷлисгоҳи Маркази миллии тестии назди Президенти Ҷумҳурии Тоҷикистон бо иштироки кормандони Марказ бахшида ба Рӯзи забони давлатӣ ҷаласа баргузор гардид. Дар ҷаласа забоншиноси маъруф, доктори илмҳои филолгӣ, профессор Баҳриддин Камолиддинов ширкат варзид.
Ба кори ҷаласа Икромӣ Хуршед, директори Марказ, оғоз бахшида, ҳозиринро ба муносибати Рӯзи забони давлатии Ҷумҳурии Тоҷикистон табрик кард ва оид ба мақому мавқеи забони тоҷикӣ, сиёсати Ҳукумати Ҷумҳурӣ дар самти забон ва пуштибониаш аз он ҳамчун забони давлатӣ ҳарф зад. Ӯ, аз ҷумла, гуфт, ки забони давлатии ҷумҳурии мо забони тоҷикӣ аст. Дар таъмини иҷрои Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” аз ҳар яки мову шумо сар карда, то идораю муассиса, кумитаю вазорат ва мақомоти баландпояи давлатӣ бояд саҳмгузор бошанд. Тибқи талаботи қонуни мазкур санадсозию ҳуҷҷатнигорӣ, инчунин коргузорӣ дар ҳама муассисаю идора ва ташкилоту мақомоте, ки дар ҳудуди Ҷумҳурии Тоҷикистон фаъолият мекунанд, ба забони давлатӣ бояд сурат гирад ва дар муросилоту дигар бахшҳои коргузорӣ риояи меъёрҳои забони давлатӣ зарур аст. Ин қонун талаб мекунад, ки тамоми шахсони мансабдор, кормандони мақомоти ҳокимияти давлатӣ ва ташкилоту муассисаҳои воқеъ дар Ҷумҳурии Тоҷикистон донандаи забони давлатӣ – тоҷикӣ бошанд. Вале, мутаассифона, воқеият чунин нест, таъкид кард мавсуф.
Сипас директори Марказ суханро ба Камолиддинов Баҳриддин дод. Мазкур бузургии забони форсӣ – тоҷикӣ, ғановати он, нирӯи бузурги илмию адабиёту фарҳангсозӣ доштани онро баён карда, ҳамчунин бо изҳори таассуф қайд кард, ки имрӯз вазъи татбиқи Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” қаноатбахш нест. Барои ин мебояд тамоми аҳли ҷомеа дастҷамъона талош варзанд. Ҳар як миллатро дар тамоми ҷаҳон, пеш аз ҳама, бо забонаш мешиносанд ва қадр мекунанд. Забондонӣ омили худшиносӣ ва ҷаҳондонӣ аст. Эҳтироми забон аз донистану омӯхтани он оғоз мегардад. Бинобар ин, ҳар яки моро мебояд баҳри забондонии худ ва фарзандонамон пайваста кӯшиш намоем, таъкид кард Б. Камолиддинов Б.
Пасон дар байни забоншинос ва аҳли ҷамъомад оид ба масъалаҳои гуногун дар атрофи забон суҳбати гуворою судманд сурат гирифт. Ҳозирин ба устод Камолиддинов суолҳо дода, посухҳои қаноатбахш гирифтанд.
