Тибқи қарори раиси шаҳри Душанбе муҳтарам Рустами Эмомалӣ аз 2-юми сентябри соли 2021, № 519 дар бораи баргузории озмуни шаҳрии «Беҳтарин сомонаҳои инноватсионӣ» сомонаи Маркази миллии тестии назди Президенти Ҷумҳурии Тоҷикистон (www.ntc.tj) сазовори мақоми аввал дониста шуд.

Ҷамъбасти озмун 22-уми ноябри соли 2021 дар кохи «Суруш» доир гардида, ғолибон бо диплом ва мукофотпулӣ қадрдонӣ шуданд.

Озмуни мазкур бо мақсади таъмини иҷрои қарори Ҳукумати Ҷумҳурии Тоҷикистон аз 30-юми декабри соли 2011, № 643 «Дар бораи Консепсияи ташаккули ҳукумати электронӣ дар Ҷумҳурии Тоҷикистон», ба муносибати 30-солагии Истиқлолияти давлатии Ҷумҳурии Тоҷикистон ва рушди фарҳанги техникии аҳолӣ, мусоидат дар рушди иқтисодию иҷтимоии пойтахт тавассути истифодаи имкониятҳои технологияҳои иттилоотию коммуникатсионӣ, татбиқи сиёсати ҳукумати электронӣ дар фаъолияти мақомоти иҷроияи ҳокимияти давлатӣ мутобиқи моддаҳои 19-ум ва 20-уми Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» ва моддаи 8-уми Қонуни Ҷумҳурии Тоҷикистон «Дар бораи мақомоти пойтахти Ҷумҳурии Тоҷикистон» аз ҷониби корхонаи воҳиди давлатии «Шаҳри ҳушманд (Smart city)»-и мақомоти иҷроияи ҳокимияти давлатии шаҳри Душанбе ташкил ва гузаронида шуд.