16 сентябри соли ҷорӣ дар толори маҷлисгоҳи Вазорати маориф бо иштироки муовинони вазир, сардорони раёсат, мудирони шуъба ва бахшҳои дастгоҳи вазорат, роҳбарони муассиса ва ташкилотҳои тобеи вазорат муаррифии сомонаи расмии Муассисаи давлатии “Маркази миллии тестӣ” (ММТ) доир гардид.

Сардори шуъбаи технологияи иттилоотию коммуникатсионии ММТ Назаров Р.С. суханронӣ намуда, оид ба бахшҳо ва зербахшҳои сомона, ҷойгир намудани иттилоот ва истифодабарии сомона қайд намуд.

 Аз муаррифӣ маълум гардид, ки сомонаи расмии ММТ бо се забон (тоҷикӣ, русӣ ва англисӣ) таҳия гардида, дар он ҳуҷҷатҳои расмии ММТ, қонунҳо ва қарорҳои Ҳукумати Ҷумҳурии Тоҷикистон, Вазорати маориф ва иттилооти пурра оид ба низоми нави имтиҳонҳои марказонидашудаи дохилшавӣ ба муассисаҳои таҳсилоти олии касбии Ҷумҳурии Тоҷикистон ҷой дода шудааст.

Дар баробари ин, дар сомона аксҳо, видеороликҳо ва сабтҳои овозӣ аз рафти чорабиниҳои ММТ ҷойгир карда шудааст, ки хонандаро барои хондани маълумотҳо ва ворид шудан ба бахшҳои сомона ҳидоят мекунад.

Дар рафти чорабинӣ ба иштирокчиён буклети иттилоотии ММТ, брошюраи низоми нав ва варақаи сомонаи расмии ММТ тақсим карда шуд.

Баъд аз муаррифии сомона, аз тарафи иштирокчиён оид ба ҷалби бештари хонандагон ба сомона ва такмил додани бахши забонҳои русӣ ва англисӣ дархостҳо пешниҳод гардид, ки аз тарафи ММТ қабул карда шуд.