Душанбе, 4-уми июли соли 2019
Имрӯз бо мақсади шиносоӣ бо вазъи марказҳои имтиҳонӣ ва рафти баргузории имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2019 як гурӯҳи иборат аз ҳайати роҳбарияти мақомоти соҳаи маорифи кишвар ба якчанд маркази имтиҳонии воқеъ дар муассисаҳои таълимии таҳсилоти умумии шаҳри Душанбе омаданд.Ба ин ҳайат сардори раёсати илм ва маърифати Дастгоҳи иҷроияи Президенти Ҷумҳурии Тоҷикистон Абдулхолиқзода Лутфия Абдухолиқ, сармутахассиси ин раёсат Насимов Нуридин Исоевич, муовини вазири маориф ва илми Ҷумҳурии Тоҷикистон Давлатзода Сайфиддин, сардори сарраёсати маорифи шаҳри Душанбе Азизӣ Маҳмадали Нуралӣ ва мудири шуъбаи маорифи ноҳияи Исмоили Сомонӣ Одилбекова Лола Қиёбековна дохил буданд.
Шахсони мазкур аввал бо ҳолати ташкил ва ҷараёни имтиҳонҳо шинос шуда, баъдан дар толори муассисаҳои таълимӣ, ки дар заминаи онҳо марказҳои имтиҳонӣ ташкил гардидаанд, бо падару модар ва шахсони дигари довталабонро ҳамроҳикарда суҳбат намуда, ба саволҳои ҳозирон посух доданд. Аз ҷумла, сардори раёсати илм ва маърифати Дастгоҳи иҷроияи Президенти Ҷумҳурии Тоҷикистон Абдулхолиқзода Л. қайд кард, ки бо мусоидат ва дастгирии бевоситаи Президенти мамлакат муҳтарам Эмомалӣ Раҳмон ва Ҳукумати Ҷумҳурӣ сол то сол нисбат ба соҳаи маориф таваҷҷуҳи бештар дода мешавад, ки ҳамасола имкону шароитҳои беҳтаринро ба ихтиёри довталабон вогузоштани Маркази миллии тестии назди Президенти Ҷумҳурии Тоҷикистон гувоҳи ин гуфтаҳост. Мову шуморо, падару модарони азиз, мебояд, ки ба қадри ин ҳама ғамхориҳои Пешвои миллат расида, ҳарчи бештар ба донишандӯзии фарзандонамон таваҷҷуҳ зоҳир намоем. Ҳар заҳмате, ки имрӯз барои фарзанди худ мекашем, самараашро фардо ҳам мову шумо ва ҳам давлату миллат хоҳад дид. Фарзандон ояндасози миллату давлатанд ва месазад, ки баҳри онҳо ҳар нирӯи моддию маънавие, ки дорем, сарф кунем.
Директори Маркази миллии тестии назди Президенти Ҷумҳурии Тоҷикистон Икромӣ Хуршед Икром, аз ҷумла қайд кард, ки шумо, падару модарон, худ шаффофияти баргузории имтиҳонҳои марказонидаи дохилшавиро ба муассисаҳои таълимии таҳсилоти миёна ва олии касбии ҷумҳурӣ шоҳид ҳастед. Таъмини принсипҳои шаффофияту адолат дар баргузории имтиҳонҳои мазкур ва натиҷаи онҳо мароми асосии Марказ ба ҳисоб меравад. Вале, бо вуҷуди ин, дар байни ҷомеа шахсоне низ вомехӯранд, ки аз содагӣ фирефтаи шахсони қаллоб мегарданд. Вазифаи мову шумо аст, ки ба чунин ашхос моҳияти низоми ин имтиҳонҳоро бифаҳмонем, то касе ба ҷуз донишу маҳорат ва малакаю маҳорат ба чизи дигаре умеду такя накунад.
Чанде аз падару модарон низ дар навбати худ изҳори ақида карда, миннатдории худро аз роҳбарияти Ҳукумати Ҷумҳурӣ ва Маркази миллии тестии назди Президенти Ҷумҳурии Тоҷикистон иброз доштанд.
