Душанбе, 24‑уми июли соли 2026
22-юми июли соли 2026 натиҷаҳои давраҳои якум ва дуюми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли 2026 эълон шуд. Ба ҳамаи довталабони ба озмуни тақсимот роҳёфта чунин паёмаки телефонӣ фиристода шуда буд: “Дар тақсимот (25.07.26) иштирок карда метавонед.”
Ба таваҷҷуҳи довталабон ва падару модарон мерасонем, ки паёмаки «Дар тақсимот (25.07.26) иштирок карда метавонед.» маънои онро надорад, ки довталаб бояд рӯзи 25-уми июли соли 2026 дар Марказ, ягон муассисаи таълимӣ ё ягон ҷойи дигар ҳозир шавад.
Ин паёмак танҳо онро мефаҳмонад, ки довталаб тибқи натиҷаҳои бадастовардааш ба озмуни тақсимот роҳ дода шуда, дар ин озмуни тақсимот иштирок мекунад.
Тақсимоти довталабон ба комбинатсияҳои ихтисосҳои интихобкардаашон тибқи тартиби муқарраршуда тавассути барномаи махсуси компютерӣ, бо дарназардошти балҳои бадастоварда, бартарии интихобҳо ва ҷойҳои нақшавӣ анҷом дода мешавад. Дар ин раванд ҳозир шудани довталаб талаб карда намешавад. Тавре дар хабари дар сомонааш нашркардаи Марказ низ шарҳ дода шудааст, тақсимот бе дахолати омили инсонӣ тавассути модули махсуси барномавӣ амалӣ мегардад.
Натиҷаи тақсимот баъд аз анҷоми озмун – 25-уми июли соли 2026 барои довталабон ба таври мухтасар тавассути паёмаки телефонӣ ва муфассал дар кабинети инфиродии довталаб дастрас мегардад.
