Душанбе, 20-уми феврали соли 2024
20-уми феврали соли 2024 дар Китобхонаи миллии Тоҷикистон дар доираи Лоиҳаи "Кумаки Иттиҳоди Аврупо ба соҳаҳои маориф ва меҳнат дар Ҷумҳурии Тоҷикистон" вобаста ба омода намудани ҳамоҳангсозони мактабҳо барои баргузории Барномаи байналмилалии дастовардҳои таҳсилии хонандагон (PISA 2025) семинари омӯзишӣ доир шуд.
Дар семинар Сабзалӣ Ҷаъфарзода, директори Маркази миллии тестии назди Президенти Ҷумҳурии Тоҷикистон (Марказ), Зиёдулло Абдулзода, муовини вазири маориф ва илми кишвар, Штефан Зиверт, роҳбари Лоиҳаи “Кумаки Иттиҳоди Аврупо ба соҳаҳои маориф ва меҳнат дар Ҷумҳурии Тоҷикистон”, Айгул Казжанова, коршиноси Лоиҳаи Иттиҳоди Аврупо, намояндагони Вазорати маориф ва илм ва директорони муассисаҳои таълимии таҳсилоти умумии асосӣ ва миёнаи умумии ноҳияҳои Шоҳмансур ва Фирдавсии шаҳри Душанбе иштироку суханронӣ намуданд.
Дар оғоз Сабзалӣ Ҷаъфарзода, директори Марказ бо суханронии худ семинари омӯзиширо ҳусни оғоз бахшида, иброз дошт, ки иштироки Ҷумҳурии Тоҷикистон дар PISA 2025 барои арзёбии сифати таҳсилот дар асоси муносибати босалоҳият, ислоҳоти соҳаи маориф, ҷорӣ намудани низоми самараноки таълим, механизмҳои институтсионалии арзёбӣ, ки дар Стратегияи миллии рушди маорифи Ҷумҳурии Тоҷикистон барои давраи то соли 2030 зикр мешавад, хубу натиҷаовар аст.
Директори Марказ дар идомаи суханронии худ, ҳамчунин қайд кард, ки тибқи нақша аз 22-юми апрел то 11-уми майи соли 2024 озмоиши маҳаллии Лоиҳаи татбиқи PISA 2025, инчунин соли 2025 таҳқиқоти асосӣ бо иштироки ҳамаи мактабҳои шаҳри Душанбе дар назар дошта шудааст.
Баъдан Зиёдулло Абдулзода, муовини вазири маориф ва илми кишвар суханронӣ намуда, зикр дошт, ки Вазорати маориф ва илм тасмим гирифтааст, ки дар баргузор кардани PISA 2025 ширкат варзида, натиҷаи таҳқиқоти мазкурро дар беҳбуд бахшидани соҳаи маориф истифода намояд.
Дар идомаи семинари мазкур, ҳамчунин дар бораи таҷриба ва натиҷаҳои иштироки Ҷумҳурии Қазоқистон дар барномаҳои байналмилалии арзёбии сифати таҳсилот, ҳамоҳангсозони воситаҳои арзёбӣ ва тартиби баргузории таҳқиқоти PISA ва мавзуъҳои ба лоиҳаи мазкур дахлдор сухан рафт.
Баъди ба итмом расидани суханрониҳо ба омӯзгороне, ки дар семинар иштирок доштанд, кори амалӣ барои дар сатҳи баланд гузаронидани озмоиши маҳаллии PISA 2025 бо иштироки хонандагон дар муасcисаҳои таълимии таҳсилоти умумии асосӣ ва миёнаи умумии ноҳияҳои Шоҳмансур ва Фирдавсии шаҳри Душанбе гузаронида шуд.
Бояд гуфт, ки Тоҷикистон (шаҳри Душанбе) бори аввал дар таҳқиқоти PISA иштирок менамояд ва Маркази миллии тестии назди Президенти Ҷумҳурии Тоҷикистон масъули гузаронидани PISA 2025 таъйин шудааст.
Семинари мазкур бо саволу ҷавоби иштирокдорон, бахусус директорони муассисаҳои таълимии таҳсилоти умумии асосӣ ва миёнаи умумии ноҳияҳои Шоҳмансур ва Фирдавсии шаҳри Душанбе ба охир расид.
Лозим ба зикр аст, ки 21-уми феврал ин гуна семинар барои омӯзгорони муассисаҳои таълимии таҳсилоти умумии асосӣ ва миёнаи умумии ноҳияҳои Исмоили Сомонӣ ва Синои шаҳри Душанбе баргузор мегардад.
