Душанбе, 14-уми январи соли 2015

Дар асоси нақшаи чорабиниҳо оид ба ташкил ва гузаронидани имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбӣ (МТМК ва МТОК)-и Ҷумҳурии Тоҷикистон дар соли 2015 аз 14-ум то 16-уми январи соли ҷорӣ семинар-машварати омӯзишӣ барои таблиғгарони ИМД-2015 баргузор мегардад.

Мақсад аз баргузор кардани чорабинии мазкур дар сатҳи баланд ташкилу ба роҳ мондани корҳои таблиғотию ташвиқотӣ ва шинос кардани тарафҳои алоқаманд бо ҷанбаҳои гуногуни ИМД буда, пас аз натиҷагирӣ аз ҳисоби номзадҳо тренер-таблиғгарони Марказ барои гузаронидани семинарҳои омӯзишии минбаъда интихоб карда мешаванд.

Тибқи барнома ба иштирокчиёни семинар кормандони Марказ оид ба низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон маълумоти пурра (презентатсияҳо) пешниҳод менамоянд. Инчунин, ба иштирокдорон маводи иттилоотӣ, аз ҷумла, дарсҳои видеоӣ барои истифодабарӣ ва дастрасии хонандагон тақсим карда мешавад.

Семинари мазкур дар бинои Донишкадаи ҷумҳуриявии такмили ихтисос ва бозомӯзии кормандони соҳаи маориф гузаронида шуда, намояндагони шуъбаҳои маорифи шаҳру ноҳияҳои ҷумҳурӣ барои иштирок дар он даъват гардидаанд.

Боиси тазаккур аст, ки тибқи нақша даври дуюми семинар-машваратҳои омӯзишӣ дар шаҳру ноҳияҳои ҷумҳурӣ рӯзҳои 28-30-юми январ бо иштироки намояндагони муассисаҳои таълимӣ ва даври сеюм – дарсҳои омӯзишӣ дар муассисаҳои таълимӣ бо ҷалби хатмкунандагон ва падару модарони онҳо дар давоми моҳи феврали соли 2015 баргузор хоҳад шуд.