Душанбе, 21-уми октябри соли 2024
21-уми октябри соли 2024 дар Китобхонаи миллии Ҷумҳурии Тоҷикистон семинари омӯзишӣ дар мавзуи “Гузариш аз зинаи таҳсилоти ибтидоӣ ба таҳсилоти умумии асосӣ” оғоз гардид.
Дар семинар намояндагони Маркази миллии тестии назди Президенти Ҷумҳурии Тоҷикистон, мутахассисони пуртаҷрибаи соҳаи маорифи Федератсияи Русия, намояндагони Сарраёсати маорифи шаҳри Душанбе, шуъбаҳои маорифи чор ноҳияи пойтахт ва мутахассисону омӯзгорони синфҳои ибтидоӣ аз мактабҳои интихобшудаи шаҳри Душанбе иштирок карданд. Дар аввал масъулони семинар дар бораи ҳадафҳои семинар гузориши муфассал доданд.
Қайд бояд кард, ки семинари мазкурро намояндагону коршиносони Маркази ҳамкориҳои байналмилалӣ оид ба рушди таҳсилот (CICED)-и Федератсияи Русия баргузор мекунанд. Маркази миллии тестии назди Президенти Ҷумҳурии Тоҷикистон бо CICED ҳамкории зич дошта, бо дастгирии он барномаҳои гуногунро дар самти арзёбии дастовардҳои таълимии хонандагон роҳандозӣ мекунад.
Мақсад аз баргузории семинар фаҳмондани абзори арзёбии салоҳиятҳои омӯзишию фаннӣ, ки дараҷаи аз худ кардани хонандагон мазмуни фанҳои таълимии “Математика” ва “Забони русӣ”-ро инъикос мекунад, инчунин модулҳои таҳсилии гузаришӣ барои синфи 5-ум аст. Абзор ва модулҳои мазкур аз ҷониби коршиносони CICED таҳия гардидааст. Бояд қайд кард, ки гузариш аз зинаи таҳсилоти ибтидоӣ ба таҳсилоти умумии асосӣ бештари ҳолатҳо ҳамчун коҳиши ангезиши хонандагон ҳисобида мешавад. Аз ин лиҳоз, аҳаммияти ин семинар дар он аст, ки дар он масъалаи ташаккули замина барои хонандагон ҷиҳати омӯзиши минбаъдаи фанҳои зикргардида, фароҳам овардани шароит барои асоси амалҳои худро дарк кардан тавонистани хонандагон, ҷалби хонандагон ба баррасии мушкилот, гузоштани масъалаҳо ва ёфтани роҳи ҳалли онҳо фаҳмонда мешавад.
Тазаккур бояд дод, ки семинари мазкур то 23-юми октябри соли ҷорӣ идома хоҳад ёфт.
