Душанбе, 7-уми феврали соли 2022

Маркази миллии тестии назди Президенти Ҷумҳурии Тоҷикистон бо мақсади омӯзиш ва интихоби роҳбарон, ёварони роҳбарон ва бақайдгирандагони нуқтаҳои бақайдгирӣ ва дар сатҳи зарурӣ ба роҳ мондани раванди бақайдгирии довталабон барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли 2022 аз 7-уми феврали соли ҷорӣ семинарҳои омӯзиширо барои кормандони нуқтаҳои бақайдгирӣ оғоз менамояд.

Мувофиқи нақша дар 34 шаҳру ноҳияи ҷумҳурӣ 40 нуқтаи бақайдгирии доимамоалкунанда бо теъдоди 142 истгоҳи корӣ ва дар 26 шаҳру ноҳияи дигар нуқтаҳои сайёри бақайдгирӣ таъсис дода мешавад.

Тибқи эълон бо тариқи электронӣ 412 нафар хоҳишманд бо мақсади иштирок дар озмун барои кор дар нуқтаҳои бақайдгирӣ ариза (бо ҳуҷҷатҳои дигар) пешниҳод намудаанд. Аз ин шумора, мувофиқи таҳлилу баррасии ҳуҷҷатҳои пешниҳодкарда, 380 нафар шахси аризадода ба семинарҳои омӯзишӣ ҷалб карда мешаванд.

Барои ташкилу баргузории семинарҳои омӯзишӣ дар шаҳру ноҳияҳои Душанбе, Хуҷанд, Бохтар, Кӯлоб, Хоруғ, Панҷакент ва Рашт аз ҷумлаи кормандони Марказ гурӯҳҳои корӣ таъсис дода шудааст. Тибқи барнома семинарҳои омӯзишӣ барои 14 гурӯҳ дар шаҳру ноҳияҳои зикршуда то 19-уми феврали соли ҷорӣ давом меёбад.

Дар асоси озмун номзадҳои мувофиқу арзанда барои кор дар нуқтаҳои бақайдгирӣ интихоб карда мешаванд, ки шумораашон 220 нафарро ташкил хоҳад дод. Бояд тазаккур дод, ки бақайдгирии довталабон барои иштирок дар имтиҳонҳои марказонидаи дохилшавӣ аз 1-уми марти соли 2022 дар Ҷумҳурии Тоҷикистон оғоз меёбад.

Бояд тазаккур дод, ки бақайдгирии довталабон 1-уми марти соли 2022 дар Ҷумҳурии Тоҷикистон оғоз меёбад.