31 майи соли 2013 - Муассисаи давлатии «Маркази миллии тестӣ» ҷиҳати омодагӣ ба имтиҳонҳои марказонидашудаи дохилшавӣ ба муассисаҳои таҳсилоти олии касбии ҷумҳурӣ дар соли 2014 бо дастгирии Шуъбаи ташкилоти байналмилалии Институти «Ҷамъияти кушода» – Бунёди мадад дар Тоҷикистон аз 27 то 30 майи соли 2013 дар меҳмонсаройи “Пойтахт” барои омӯзгорони фанни забон ва адабиёти тоҷик семинари омӯзишӣ баргузор намуд.
Дар кори семинари омӯзишӣ 51 нафар омӯзгор аз тамоми вилоятҳо, ноҳияҳои тобеи ҷумҳурӣ ва шаҳри Душанбе иштирок намуданд.
Дар тӯли 4 рӯз мушовирони маҳаллӣ ба онҳо доир ба эссе (навъи кори хаттиест, ки бори аввал дар имтиҳонҳои марказонидашудаи дохилшавӣ (ИМД) истифода мешавад, ба истилоҳи дигар иншои мухтасар) маълумоти муфассали илмиву методӣ доданд.
Омӯзгорон дар ин муддат доир ба сохтори эссе, тартиби навиштани эссе, меъёрҳои баҳо ба эссе, варақаи кори хаттӣ (эссе), тартиби пур кардани варақаи кори хаттӣ аз рӯйи чор меъёри баҳо ба мазмун ва мундариҷаи эссе, меъёри баҳо ба ғалатҳо, тартиби тафтиш ва гузоштани аломатҳои ишоратӣ, тафтиши эссе тибқи талаботи чор меъёри баҳо ба мазмун ва мундариҷаи эссе, ҳаҷми эссе ва таъсири он ба холгузорӣ, тафтиши дубораи эссе, тарзи тафтиш ва баҳогузории ин навъи кори хаттӣ маълумоти мукаммал гирифтанд ва донишҳои назариявии гирифтаашонро амалан дар тафтиши намунаи эссеҳо дар мавзӯъҳои гуногун санҷиданд.
Мақсади асосии семинар омода намудани тафтишгарони кори хаттӣ аз ҳисоби омӯзгорони ҳамаи минтақаҳои ҷумҳурӣ ба ҳисоб меравад (иштироки ин омӯзгорон дар тафтиши кори хаттии 7 115 нафар хонанда, ки дар Озмоиши калони ИМД моҳи июни соли равон иштирок менамоянд, дар назар аст).
