Душанбе, 17-уми марти соли 2025
17-уми марти соли 2025 дар муассисаи таълимии таҳсилоти миёнаи умумии № 19-и ноҳияи Синои шаҳри Душанбе семинари омӯзишӣ барои тренерони маъмурони озмоиши маҳаллии арзёбии байналмилалии PIRLS 2026 оғоз гардид.
Дар семинари мазкур муовини вазири маориф ва илми Ҷумҳурии Тоҷикистон Каримзода Равшан Азам, муовини якуми директори Маркази миллии тестии назди Президенти Ҷумҳурии Тоҷикистон Шодиниё Абдулбосит Шодӣ, муовини директори Агентии назорат дар соҳаи маориф ва илми назди Президенти Ҷумҳурии Тоҷикистон Назарализода Дилафрӯз Муҳамадалӣ, намояндагони сохтору муассисаҳои соҳаи маорифи шаҳру ноҳияҳои ҷумҳурӣ ва дигар масъулин иштирок намуданд.
Дар оғоз муовини вазири маориф ва илми Ҷумҳурии Тоҷикистон Каримзода Равшан Азам дар бораи ҳадафи асосии иштироки хонандагони синфи 4-уми Ҷумҳурии Тоҷикистон дар Таҳқиқоти байналмилалии пешрафти саводи хондан Progress in International Reading Literacy Study (PIRLS) 2026 суханронӣ намуда, қайд кард, ки мақсади асосии иштироки хонандагон дар ин азрёбии байналмилалӣ пеш аз ҳама баланд бардоштани сатҳи саводи хонандагон ва ташвиқ намудани онҳо ба хониши ҳадафмандонаву бошуурона ва пурсамар мебошад.
Сипас муовини якуми директори Маркази миллии тестии назди Президенти Ҷумҳурии Тоҷикистон Шодиниё Абдулбосит Шодӣ дар бораи аҳаммияти баргузории озмоиши мазкур суханронӣ карда, аз иштирокдорони семинар ва масъулин даъват намуд, ки барои гузаронидани озмоиш омода бошанд ва барои босифат анҷом додани корҳо дар ин самт талош намоянд.
Бояд қайд кард, ки семинари мазкур 3 рӯз (17-ум, 18-ум ва 19-уми марти соли 2025) идома карда, дар он масъалаҳои вобаста ба ташкилу баргузории арзёбии байналмилалии PIRLS 2026 ва озмоиши маҳаллии он, асосҳои методологӣ, намудҳои матнҳо ва саволҳо, малакаҳои хониш ва меъёри холгузорӣ ба саволҳо, малакаҳои заминавии кор бо компютер барои хонандагон, барномаи намунавии арзёбии PIRLS 2026, вазифа ва уҳдадориҳои кормандони муваққатии озмоиши маҳаллӣ, ҳамкории мактаб ва волидайн дар раванди пурсиши волидайн ва кормандони мактаб, тартиби истифодаи таҷҳизоти техникӣ дар PIRLS 2026 ва масъалаҳои дигари марбут ба он баррасӣ карда мешаванд.
