Душанбе, 8-уми апрели соли 2024
8-уми апрели соли 2024 дар маҷлисгоҳи муассисаи таълимии таҳсилоти миёнаи умумии № 12-и ноҳияи Исмоили Сомонии шаҳри Душанбе дар доираи Лоиҳаи “Кумаки Иттиҳоди Аврупо ба соҳаҳои маориф ва меҳнат дар Ҷумҳурии Тоҷикистон” вобаста ба омода намудани ҳамоҳангсозони мактабҳо барои баргузории озмоиши маҳаллии Барномаи байналмилалии дастовардҳои таҳсилии хонандагон (PISA 2025) семинари омӯзишӣ гузаронида шуд.
Дар он Ҷаъфарзода Сабзалӣ, директори Маркази миллии тестии назди Президенти Ҷумҳурии Тоҷикистон (Марказ), Айгул Казжанова, коршиноси Лоиҳаи Иттиҳоди Аврупо оид ба таҳсилоти миёнаи умумӣ, Ёров Аслиддин, муовини сардори Сарраёсати маорифи шаҳри Душанбе ва директорону намояндагон аз 71 муассисаи таълимии таҳсилоти миёнаи умумӣ ва умумии асосӣ, ки аз ноҳияҳои шаҳри Душанбе интихоб шуда буданд, иштирок карданд.
Ҷаъфарзода Сабзалӣ, директори Марказ, дар оғоз вобаста ба PISA 2025 ва озмоиши маҳаллии он, ки аз 6-ум то 21-уми майи соли 2024 дар муассисаҳои таълимии таҳсилоти миёнаи умумӣ ва умумии асосии интихобшудаи ш. Душанбе баргузор мешавад, ба иштирокдорон маълумот дода, зикр кард, ки PISA санҷиши тестист, ки тавассути он дар кишварҳои гуногуни ҷаҳон донишу саводи амалкардӣ (функсионалӣ)-и хонандагон ва қобилияти дар амал истифода кардани он арзёбӣ карда мешавад.
Саводи амалкардӣ қобилияти дар ҳаёт татбиқ кардани дониш ва малакаю маҳоратҳои андӯхтаи муҳассилин дар мактаб аст. Ин дараҷаи маълумот (дониш)-ест, ки дар давоми таҳсил ба даст оварда шуда, қобилияти ҳалли масъалаҳои ҳаётиро дар соҳаҳои гуногуни он пешбинӣ мекунад. PISA на танҳо арзёбии дониши азхудкарда, инчунин арзёбии салоҳият (малакаю маҳорату қобилият)-и истифодаи дониш дар шароити наву гуногун ва ҳолатҳои воқеиро мавриди андозагирию арзёбӣ қарор медиҳад, – дар идомаи суханронӣ гуфт директори Марказ Ҷаъфарзода С.
Чанде аз иштирокдорони дигари семинар низ вобаста ба PISA 2025 ва озмоиши маҳаллии он суханронӣ карданд.
Дар охири семинар директорону намояндагони муассисаҳои таълимии таҳсилоти миёнаи умумӣ ва умумии асосии интихобгардидаи шаҳри Душанбе, ки дар озмоиши маҳаллии PISA 2025 иштирок мекунанд, ба саволҳояшон аз ҷониби мутахассисон посухи дахлдор гирифтанд.
Лозим ба зикр аст, ки озмоиши маҳаллии PISA 2025 моҳи майи соли 2024 дар ш. Душанбе ва арзёбии асосии он соли 2025 аз ҷониби Маркази миллии тестии назди Президенти Ҷумҳурии Тоҷикистон ва Вазорати маориф ва илми Ҷумҳурии Тоҷикистон гузаронида мешавад.
