Душанбе, 6-уми феврали соли 2017

Мувофиқи нақшаи чорабиниҳо оид ба ташкил ва гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли таҳсили 2017-2018 аз 6-ум то 17-уми феврали соли ҷорӣ семинари омӯзишӣ барои кормандони нуқтаҳои бақайдгирӣ баргузор мегардад.

Мақсад аз баргузории чорабинии мазкур омӯзиш ва интихоби роҳбарон, ёварон ва бақайдгирандагони нуқтаҳои бақайдгирӣ ва дар сатҳи зарурӣ ба роҳ мондани раванди асосии бақайдгирии довталабон барои иштирок дар имтиҳонҳои марказонидаи дохилшавӣ ба муассисаҳои таҳсилоти миёна ва олии касбии Ҷумҳурии Тоҷикистон дар соли 2017 аст.

Бояд қайд кард, ки семинари омӯзишии кормандони нуқтаҳои бақайдгирӣ тибқи барнома ва модули тасдиқгардида баргузор гашта, дар асоси озмуни Марказ беҳтаринҳо интихоб ва ба кори муваққатӣ ҷалб карда мешаванд.

Барои иштирок дар ин семинар ва ҷалб гардидан ба кори муваққатӣ дар давраи бақайдгирӣ 275 нафар аз шаҳру ноҳияҳои ҷумҳурӣ ҳуҷҷат пешниҳод кардаанд, ки аз ин шумора вобаста ба таҳлил ва санҷишҳои пешакӣ 261 нафар барои иштирок дар семинари мазкур роҳ ёфтанд. Хотиррасон менамоем, ки семинари мазкур дар шаҳрҳои Душанбе, Қӯрғонтеппа, Кӯлоб, Хуҷанд ва Хоруғ доир мегардад.

Пас аз баргузории курсҳо ва имтиҳони иштрокдорон 180 нафар ба кори муваққатӣ ҷалб шуда, фаъолияти бақайдгирандагони интихобшуда аз 1-уми марти соли ҷорӣ шурӯъ мегардад.