Душанбе, 1-уми июни соли 2021
Дар доираи корҳои омодагӣ барои гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2021 Маркази миллии тестии назди Президенти Ҷумҳурии Тоҷикистон семинарҳои омӯзиширо барои кормандони муваққатӣ: роҳбари маркази имтиҳонӣ, ёвари роҳбари маркази имтиҳонӣ, маъмури калони маркази имтиҳонӣ, маъмури имтиҳони маркази имтиҳонӣ ва бақайдгирандаи маркази имтиҳонӣ доир менамояд.
Семинарҳои омӯзишӣ аз 31-уми май то 10-уми июни соли 2021 дар 18 шаҳру ноҳияи ҷумҳурӣ (26 нуқта) гузаронида мешавад. Мувофиқи эълон барои иштирок дар семинарҳои омӯзишӣ 4550 нафар хоҳишманд ҳуҷҷат супорида буданд. Баррасии ҳуҷҷатҳои пешниҳодкардаи хоҳишмандон аз тарафи раёсати кадрҳо, коргузорӣ ва иттилооти Марказ маълум кард, ки ҳуҷҷатҳои 3456 нафар хоҳишманд мувофиқи талаботи муқарраршуда пешниҳод карда шудаанд.
Раёсати ташкил ва идораи имтиҳон, робита бо ҷомеа ва таъминоти иттилооти Марказ баррасӣ карда, мувофиқати номзадонро ба талаботи тахассусии муқарраршуда аз рӯйи ҳуҷҷатҳояшон, муайян сохт, ки ба 2920 нафар довталаби барои кор ариза пешниҳодкарда барои ширкаташон дар семинарҳои омӯзишӣ иҷозат дода шавад.
Шунавандагони семинар (2920 нафар) аз рӯйи панҷ гурӯҳи зерини вазифаҳо тақсим карда шуданд, ки ба онҳо 29 нафар тренер (ҳамчун корманди муваққатӣ) ва 23 нафар корманди доимии Марказ дарс медиҳанд: 1) роҳбари маркази имтиҳонӣ, 2) ёвари роҳбари маркази имтиҳонӣ, 3) маъмури калони имтиҳон, 4) маъмури имтиҳон, 5) бақайдгирандаи маркази имтиҳонӣ.
Ҳайати гурӯҳи корӣ пас аз ду рӯзи дарсӣ ба шунавандагон дар асоси дарсҳои омӯхтаашон (бо такя ба барнома, модули омӯзишӣ ва маводи иловагии ёрирасон) бо пешниҳоди саволномаҳо, баъди арзёбии донишу маҳорати шунавандагон дар асоси талаботу принсипҳои муқарраршуда аз байни онҳо зиёда аз 2000 нафарро тибқи вазифаҳои номбурда интихоб ва ба кори муваққатӣ дар Марказ ҷалб мекунанд.
Лозим ба зикр аст, ки тибқи фармоиши вазири маориф ва илми Ҷумҳурии Тоҷикистон дар 18 шаҳру ноҳияи ҷумҳурӣ 47 маркази имтиҳонӣ ташкил карда мешавад. Фаъолияти марказҳои имтиҳонӣ аз 1-уми июл оғоз мегардад ва кормандони интихобшуда дар ин марказҳо фаъолият хоҳанд кард.
