Душанбе, 17-уми майи соли 2021

Бо мақсади омодагӣ барои гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2021 Маркази миллии тестии назди Президенти Ҷумҳурии Тоҷикистон (минбаъд − Марказ) семинарҳои омӯзиширо барои тренерони кормандони муваққатӣ доир менамояд.

Чунин семинарҳои омӯзишӣ аз 17-ум то 18-уми майи соли 2021 дар муассисаи таълимии таҳсилоти миёнаи умумии № 6-и шаҳри Душанбе барои намояндагони шаҳри Душанбе, шаҳру ноҳияҳои тобеи ҷумҳурӣ ва Вилояти Мухтори Кӯҳистони Бадахшон бо иштироки 13 нафар шунаванда, аз 20-ум то 21-уми май дар бахши минтақавии Марказ, шаҳри Хуҷанд барои намояндагони шаҳру ноҳияҳои вилояти Суғд бо иштироки 11 нафар шунаванда, аз 20-ум то 21-уми май дар муассисаи таҳсилоти умумии № 12-и шаҳри Бохтар барои намояндагони шаҳру ноҳияҳои водии Вахши вилояти Хатлон бо иштироки 10 нафар шунаванда ва дар муассисаи таҳсилоти умумии № 45-и шаҳри Кӯлоб барои намояндагони шаҳру ноҳияҳои минтақаи Кӯлоби вилояти Хатлон бо иштироки 11 нафар шунаванда баргузор мегардад.

Дар баробари ин, аз ҳисоби кормандони Марказ 26 нафар ба семинарҳои омӯзишӣ ҷалб карда мешаванд ва ҳамроҳ бо тренерон дар давоми моҳи июни соли ҷорӣ дар 18 шаҳру ноҳияи ҷумҳурӣ семинарҳои омӯзишии кормандони муваққатии марказҳои имтиҳониро ташкил ва баргузор менамоянд.

Ҳайати гурӯҳи корӣ барои ташкил ва баргузории семинари омӯзишӣ барнома, модули омӯзишӣ ва маводи иловагии ёрирасонро омода ва пас аз ду рӯзи дарсӣ ба шунавандагон дар асоси дарси гузашта саволномаҳо пешниҳод менамоянд. Шунавандагон дар асоси талаботу принсипҳои муқарраршуда арзёбӣ карда мешаванд.

Бояд қайд кард, ки тибқи эълони пешакӣ ҷиҳати иштирок дар озмуни интихоби корманди муваққатӣ ба ҳайси тренер 58 нафар хоҳишманд ҳуҷҷат пешниҳод намуданд. Баъд аз омӯзиш ва таҳлилҳо ба 45 нафар хоҳишмандон иҷозат дода шуд, то ки дар семинарҳои омӯзишии тренерон иштирок намоянд. Аз байни онҳо 33 нафар ба ҳайси тренер интихоб ва ба кори муваққатӣ дар Марказ ҷалб карда мешаванд.