Душанбе, 21‑уми ноябри соли 2014

14‑уми ноябри соли 2014 дар маҷлисгоҳи Донишкадаи соҳибкорӣ ва хизмат дар доираи Шӯрои ректорони муассисаҳои таълимии таҳсилоти олии касбии Тоҷикистон бо иштироки вазири маориф ва илми Ҷумҳурии Тоҷикистон Нуриддин Саид семинар-машварат баргузор гардид.

Дар кори семинар-машварат кормандони масъули Вазорати маориф ва илми Ҷумҳурии Тоҷикистон, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Маркази миллии тестии назди Президенти Ҷумҳурии Тоҷикистон, ректорон ва директорони муассисаҳои таҳсилоти миёна ва олии касбии кишвар ширкат варзиданд.

Рӯзномаи семинар ба низоми имтиҳонҳои марказонидаи дохилшавӣ ба муассисаҳои таҳсилоти олии касбӣ (МТОК) бахшида шуд. Директори марказ Тешаев Х. И. вобаста ба “Ҷамъбасти ИМД-2014 ва вазифаҳо барои соли таҳсили 2015-2016”  баромад намуд.

Дар ҷараёни муҳокима иштирокдорон вобаста ба бурду бохти низоми нави дохилшавӣ ба МТОК, ки бори аввал дар Тоҷикистон роҳандозӣ гардид, ибрози назар намуданд. Бо мақсади беҳдошти низоми мазкур ва такмили он барои солҳои минбаъда ва аз байн бурдани мушкилоту монеаҳои мавҷуда як қатор таклифу тавсияҳо пешниҳод гаштанд.

Доир ба андешидани чораҳои мушаххас дар мукаммал гардидани низом вазири маориф ва илми Ҷумҳурии Тоҷикистон Нуриддин Саид ба масъулини вазорат ва соҳаи маориф супоришҳои мушаххас дод.