Душанбе, 15-уми феврали соли 2018

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Рахмон дар Паёми навбатии худ ба Маҷлиси Олии кишвар таъкид намудаанд, ки «озодиву истиқлолият бароямон дастоварди бузургтарин ва ғояи муқаддаси миллӣ буда, мо бо вуҷуди мушкилоти ҷойдошта барои ҳимоя ва пойдору устувор мондани он минбаъд низ тамоми саъю талоши худро равона месозем ва ин неъмати бузурги миллатамонро чун гавҳараки чашм эҳтиёту ҳифз мекунем”.

Воқеан, масъалаи таъмин ва нигаҳдошти суботу якпорчагии миллӣ ба як стратегия давлатии кишвари мо табдил ёфта, дар зимни он тақдири ҳар як фарди кишвар чун масъалаи муҳим арзёбӣ мегардад. Дар замони муосир тавре ба назар мерасад, фазои иттилоотиву тарғиботии Ғарбу Шарқ махлут гардида, барои таъсиррасонӣ ба тафаккури наврасону ҷавонон дар набарданд. Далели ин гуфтаҳо иштироки бархе аз ҷавонони ноогоҳу зудбовар дар ҷангҳои дохилии кишварҳои арабӣ буда метавонад. Бо дарназардошти муҳиммияти масъалаи мазкур волидайн, омўзгорону донишмандони бахшҳои сиёсатшиносӣ, педагогика, равоншиносӣ, хуқуқшиносиро мебояд чораҳои зарурӣ ва бетаъхир биандешанд, то сари вақт пеши роҳи чунин зуҳуроти воқеан нангин гирифта шавад.

Зимнан коре бояд кард, ки ба таносуби дин ва сиёсат баҳои воқеӣ дода шавад. Зеро муносибати байниҳамдигарии сиёсату дин дар ҳама давру замон дар як сатҳ карор надошт ва дошта ҳам наметавонад. Онҳо чун шаклҳои шуури ҷамъияти тамоми тағйиротҳои сифатии инкишофи ҷомеаро дар раванди таърих ифода менамоянд. Ба муносибатҳои байнҳамдигарии сиёсат ва дин ҷараёну авомили мухталиф таъсиррасон мебошанд. Аз ин лиҳоз, сатҳи ин муносибатҳо аз вазъи ташаккули ҷараёну воқеоти ҷамъиятӣ вобаста мебошад.

Дар моддаи 26-уми Конститутсияи Тоҷикистон омадаст, ки ҳар як кас ҳақ, дорад муносибати худро нисбат ба дин мустақилона муайян намояд, алоҳида ва ё якҷоя бо дигарон динерo пайравӣ намояд ва ё пайравӣ накунад, дар маросим ва расму оинҳoи динӣ иштирок намояд.

Имрӯзҳо бо дарназардошти нақши дин ва фарҳанги динӣ дар ташаккули ҷомеаи муосир Ҳукумати мамлакат сиёсати самаранокеро дар ин самт татбиқ менамояд. Дар кишвари мо шароити мусоиди фаъолияти иттиҳодияҳои динӣ муҳайё мебошад.

Аммо мутаасифона, чунин шароити хуби фазои маънавиро роҳбарон ва аъзоёни ҳизби ифротию террористии ҲНИТ нодида гирифта, даст ба ҷинояту хиёнат заданд. Онҳо берун аз кишвар дар манотиқи гуногун бо дастгирии хоҷагони худ бо ҳар василае тафриқаандозӣ дар миёни ҷомеаро ба роҳ мемонанд, бо хар роҳу усул кӯшиш доранд, мардумро ба ғафлату гумроҳӣ андозанд. Чунин амалкардҳои нангини ТЭТ ҲНИТ буд, ки фаъолияти он дар марзи муқаддаси Ватани мо мамнуъ эълон гардид. Новобаста аз ин, ҳоло ҳам иддеа аз манфиатхоҳони ин гурӯҳ, аз ҷумла хоини миллату мазҳаб Сайидюнуси Истаравшанӣ ва ҳаммаслаконаш аз ҳар сӯрохие сар бурун карда, бо таъсиси анҷуману фирқаҳои дасисаангез ҷониби давлату миллати худ санги маломат мезананд. Бехабар аз он, ки чунин найрагу дасисабозиҳо дигар обрӯи давлати Тоҷикистон ва миллати тоҷикро дар арсаи ҷаҳонӣ коҳиш намедиҳад. Зеро имрӯз тамоми ҷаҳон аз сиёсати оқилона ва ташабусҳои ҷаҳонии Пешвои миллат огоҳанд ва огоҳии комиле низ аз қатлу куштор ва сиёсатҳои духӯраву дугонаи ташкилоти ифротию террористии ҲНИТ доранд.

Санги бадгавҳар агар косаи заррин шиканад,

Қимати санг наяфзояду зар кам нашавад.

Маъруф Шонасурдинов,

мудири бахши таҳсилоти динии Кумита

Бознашр аз сомонаи Кумитаи оид ба корҳои дин, танзими анъана ва ҷашну маросимҳоимиллии назди Президенти Ҷумҳурии Тоҷикистон (http://din.tj/?q=node/635).