Душанбе, 30-юми январи соли 2025
30-юми январи соли 2025 дар толори Маркази миллии тестии назди Президенти Ҷумҳурии Тоҷикистон ба муносибати ҷашни Сада бо иштироки роҳбарият ва кормандони Марказ ҷаласаи тантанавӣ баргузор гардид.
Ҷаласаро директори Марказ Ҷаъфарзода Сабзалӣ Файзалӣ бо суханони табрикӣ оғоз намуда, дар бораи аҳаммияти анъанаю ҷашнҳои ниёгон, бахусус ҷашни Сада суханронӣ карда, таъкид дошт, ки нигоҳ доштан ва ба наслҳои оянда мерос гузоштани фарҳангу тамаддуни худ барои ҳар миллат ва ҳар насли он хеле муҳим аст. Ҷаъфарзода С. Ф. иброз доштанд, ки фарҳанги мо на танҳо таърих, маданият аст, дониши коромаду корсоз, хиради созандаю боровар аст, ки барои мо дар ҳалли ҳар мушкилот чорасоз мебошад. Дар Ҷумҳурии Тоҷикистон бо ташаббуси Пешвои миллат, Асосгузори сулҳу ваҳдати миллӣ, Президенти Ҷумҳурии Тоҷикистон муҳтарам Эмомалӣ Раҳмон бисёр ҷашнҳо ва арзишҳои дигари фарҳангии мо дубора эҳё гардид. Сада низ дар кишвари фарҳангдӯсту фарҳангпарвари мо ҳамасола расман 30-юми январ ҷашн гирифта мешавад. Ин ҷашн рамзи наздикшавӣ ба баҳор аст ва он дар зарфияташ бедории табиат, эҳёи зиндагиро ғунҷонидааст ва ҳамчун ҷашни миллӣ моро ба ваҳдат, ба қадршиносӣ ва ҳифзи реша, ҳувияти миллиамон мехонад ва то чӣ андоза барои миллат муҳим будани инро шумо худ ҳама медонед. Мо дар замоне зиндагӣ дорем, ки пайванди анъана ва навию навгонӣ, пайванди гузаштаю муосир бештар аз ҳар вақта зарурат дорад, зеро донистани решаҳо ва таъриху фарҳанги гузашта як омили ташаккули худшиносист ва худшиносӣ як омили шинохти арзишҳои миллию давлатӣ, омили ваҳдату ҳамзистӣ аст. Бинобар ин, донистани арзишҳое, ки шахсияти моро ташаккул медиҳад ва нигоҳ доштани онҳо хеле муҳим аст.
Дар идомаи ҷаласа сардори раёсати таҳияи маводди имтиҳони Марказ Азимов Ҷамшед ва сармутахассиси фанни таърихи раёсати таҳияи маводди имтиҳони Марказ Зарифов Насимҷон дар бораи ҷанбаҳои фалсафӣ ва таърихии ҷашни Сада суханронӣ намуда, аз ҷумла қайд карданд, ки Абулқосим Фирдавсӣ дар “Шоҳнома” пайдоиши ҷашни Садаро ба подшоҳи дуюми пешдодӣ Ҳушанг нисбат медиҳад. Мувофиқи нигориши шоир Ҳушанг ба мардум тарзи афрӯхтани оташро омӯзонид ва ҷашни Садаро бунёд гузошт. Ҳушанг рӯзе ҳамроҳи ёронаш ба шикор рафт. Дар шикоргоҳ мори сиёҳи дарозеро дучор омад, ки ба одамон ҳамла меовард. Санги калонеро бардошта, сӯи мор ҳаво дод ва он санг ба санги дигаре бархӯрда, шарора афканд. Ӯ аз шарора афкандани ду санг ба ҳайрат омада, онро чун шуои фурӯғи яздонӣ пазируфт ва аз ҳамон рӯз бузургдошти оташро ба ҷо овард. Ин маросим ҷашни Сада номида шуд, ки онро халқҳои ориёинажод то имрӯз пос медоранд.
Ҳамзамон таъкид гардид, ки Сада моро аз фарорасии мавсими нав дарак медиҳад, наслҳоро ба ҳам мепайвандад ва ҷомеаро муттаҳид мекунад. Сада мардумро ба шодӣ меораду эҳтиромашонро ба табиат меафзояд.
Дар охири маҷлис 3 нафар аз ҷумлаи кормандони Марказ барои хидматҳои шоён бо сипосномаи Марказ қадргузорӣ карда шуданд.
