Душанбе, 24-уми апрели соли 2018

Дар маҷлисгоҳи Маркази миллии тестии назди Президенти Ҷумҳурии Тоҷикистон бо иштироки кормандони Марказ ҷаласа баргузор гардид. Дар рӯзномаи он масъалаҳои пешгирӣ аз гароиши занон ва духтарон ба фарҳангӣ бегона баррасӣ гардид. Дар ҷаласа муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон Олимӣ Марҳабо Латифзода иштирок ва суханронӣ намуд.

Ҷаласаро Раҳмонов М. Н., муовини директори Марказ, ифтитоҳ карда, дар бораи масъалаи мавриди назар ҳарф зада, суханро ба муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон Олимӣ М. Л. дод. Олимӣ М. Л. қайд намуд, ки масъалаи ба фарҳанги миллии либоспӯшӣ риоя накардани занону духтарон, дар либоспӯшӣ ба қавму миллатҳои бегона пайравӣ кардани онҳо, инчунин мардон, хурофотпарастӣ кардани онҳо ҷомеаи имрӯзаро бе ташвиш гузошта наметавонад. Ин масъаларо Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар чандин баромадҳояшон қайд намуда, барои тадбирҷӯӣ ба вазорату идораҳои дахлдор як қатор супоришҳо додаанд. Кумитаи кор бо занон ва оилаи назди Ҳукумати Ҷумҳурии Тоҷикистон нисбат ба ин масъала бетарафӣ зоҳир накарда, дар ҳамкорӣ бо вазоратҳои фарҳанг; меҳнат ва шуғли аҳолӣ; маориф ва илм; тандурустӣ ва ҳифзи иҷтимоӣ; Кумитаи ҷавонон, варзиш ва сайёҳӣ ва Кумитаи оид ба корҳои дин ва ҷашну маросимҳо дар охири соли 2017 ва аввали соли 2018 “Дастурамали либосҳои тавсиявӣ барои духтарон ва занон”-ро барои занону духтарони аз ҳафтсола то ҳафтодсола ба чоп расонданд. Дар ин дастурамал тамоми намуди либосҳои тавсияшаванда барои истифода нишон дода шуда, дар интихоби ранг ва дӯхт ягон маҳдудият барои занону духтарон нест. Қонуни Ҷумҳурии Тоҷикистон “Дар бораи хизмати давлатӣ”, Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” ва дигар қонунҳои амалкунандаи ҷумҳурӣ талаб мекунад, ки мо арзишҳои миллии худро ҳифз созем, таъкид карда Олимӣ М. Л.