Душанбе, 10-уми октябри соли 2023
Таъмини волоияти қонун, таҳкими қонуният, тартиботи ҳуқуқӣ, мубориза бар зидди ҷинояткорӣ ва ҳифзи ҳуқуқу озодиҳои инсон ва шаҳрванд танҳо вазифаи мақомоти прокуратура набуда, балки саҳм гирифтан дар он ва мусоидат кардан рисолати шаҳрвандии ҳар узви ҷомеа маҳсуб мешавад.
Ин нуктаро прокурори Раёсати назорати иҷрои қонунҳо оид ба ноболиғон ва ҷавонони Прокуратураи генералии Ҷумҳурии Тоҷикистон Наботов Мироҷиддин дар ҷаласае, ки рӯзи 10-уми октябри соли 2023 дар Маркази миллии тестии назди Президенти Ҷумҳурии Тоҷикистон (Марказ) баргузор гардид, қайд кард. Мазкур аҳли ҷаласа – кормандони Марказро аз он иттилоъ дод, ки Прокуратураи генералии Ҷумҳурии Тоҷикистон ҳолати риоя ва иҷрои талаботҳои “Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон”‑ро, ки бо қарори Ҳукумати Ҷумҳурии Тоҷикистон аз 29-уми апрели соли 2023, № 188 тасдиқ шудааст, мавриди санҷиш қарор дод. Ин санҷиш фаъолияти Марказро дар самтҳои бақайдгирии довталабон барои ширкат дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли 2023, ташкилу баргузории ин имтиҳонҳо, додани имтиёзҳо ба гурӯҳҳои дахлдори довталабон, роҳандозии озмунҳои тақсимоти довталабон ба муассисаҳои таълимии таҳсилоти миёнаву олии касбии ҷумҳурӣ, ҳолати баррасии аризаҳои аппелятсионӣ ва монанди инҳоро дар бар гирифта буд.
Натиҷаи санҷиш нишон дод, ки фаъолияти Марказ, умуман, аз лиҳози риояи Тартиби мазкур ва асноду қонунҳои дахлдори дигар хуб аст. Чунончи, аз ҷониби довталабон ворид нашудани ягон дона аризаи апеллятсионӣ дар бораи вайрон гардидани тартиби муқарраршудаи имтиҳонҳо дар соли 2023 як далели ин аст. Аммо, бо вуҷуди ин, баъзе камбудию норасоӣ ё иштибоҳу нуқсонҳо дар баъзе аз самтҳои ИМД ба мушоҳида мерасиданд, – қайд кард Наботов М. – намояндаи Прокуратураи генералии Ҷумҳурии Тоҷикистон.
Наботов М. камбудию иштибоҳоти дар рафти санҷиши Прокуратураи генералии Ҷумҳурии Тоҷикистон мушоҳидашударо зикр кард. Заъфу нокифоягии корҳои иттилоърасонию таблиғотӣ дар байни довталабон ва волидайни онҳо, ширкати ғайрифаъол ё тамоман иштирок накардани комиссияҳои ҷамъиятӣ дар баъзе аз марказҳои имтиҳонӣ барои назорати раванди имтиҳонҳо, ғалатҳо зимни барасмиятдарории бархе ҳуҷҷатҳо аз ҷумлаи масъалаҳоеянд, ки барои беҳтар кардани кор вобаста ба онҳо Марказ бояд чораҷӯӣ кунад, – иброз дошт ӯ.
Ҷаъфарзода Сабзалӣ Файзалӣ – директори Марказ бо изҳори сипос аз намояндаи Прокуратураи генералии Ҷумҳурии Тоҷикистон гуфт, ки ҳамкориҳо бо мақомоти ҳифзи ҳуқуқ, дар назар гирифтани тавсияву маслиҳатҳои мутахассисони ин соҳаҳо барои баланд бардоштани савияи дониш ва малакаи касбии кормандон, бартараф кардани камбудию ғалатҳо, минбаъд роҳ надодан ба иштибоҳот, такмили низоми ИМД ва дар сатҳи зарурӣ баргузор кардани ин имтиҳонҳо ва беҳбудии кори Марказ мусоидат хоҳад кард.
