Душанбе, 19-уми декабри соли 2014
Дар ноҳияи Исмоили Сомонӣ боз як ташкилоти нави ҳизбӣ аз ҳисоби кормандони Маркази миллии тестии назди Президенти Ҷумҳурии Тоҷикистон таъсис дода шуд.
Назира Азимова, мудири шуъбаи кор бо занон ва ҷавонони КИ ҲХДТ дар ноҳияи Исмоили Сомонӣ бо кормандони марказ борҳо суҳбат намуда, Оиннома ва Барномаи ҲХДТ-ро ба онҳо ошно сохт. Ҳамин буд, ки дар дили ҷавонони зиёде хоҳиши ба Ҳизби Халқии Демократии Тоҷикистон шомил шудан пайдо шуд. Дар як муддати кӯтоҳ ба унвонии КИ ҲХДТ дар ноҳияи Исмоили Сомонӣ зиёда аз 12 нафар кормандони марказ барои ба сафи ҳизб дохил шудан ба таври хаттӣ муроҷиат намуданд.
Бояд зикр кард, ки то ин дам дар марказ 10 нафар аъзои ин ҳизби бонуфузи ҷумҳурӣ фаъолият мекарданд. Бинобар ин, аз ҳисоби кормандони Маркази миллии тестӣ ташкилоти нави ҳизбӣ таъсис дода шуд, ки он бо таклифу пешниҳоди аъзо «Раҳнамо» унвон гирифт. Аъзои ҳизб ба раисии ташкилоти навтаъсис директори муассиса Хуршед Тешаев ва ба муовинии он корманди соҳибтаҷриба Маҳмадалӣ Раҳмоновро интихоб намуданд.
Муовини раиси КИ ҲХДТ дар ноҳияи Исмоили Сомонӣ Носирҷон Мирзоев зимни баромади хеш дар бораи масъулияти аъзои ҳизб ва вазифаҳои асосии онҳо, бахусус дар давраи маъракаҳои сиёсӣ, аз ҷумла, интихоботи қарибулвуқӯъ изҳори андеша намуд. Ҳамчунин, мавсуф оид ба вазифаҳое, ки Анҷумани XII ҲХДТ дар назди ҳар аъзо ва кормандони масъули ҳизб гузошт, маълумоти мухтасар дод.
Хуршед Тешаев, раиси ташкилоти ибтидоии ҳизбии «Раҳнамо» аз ҷумла изҳор кард, ки вазифаи асосӣ ва аввалиндараҷаи кормандони марказ ба довталабон, волидайну аҳли ҷомеа расонидани маълумоти мушаххаси илмӣ ва раҳнамоӣ кардани довталабон аз тариқи барномаҳои мукаммали тестӣ барои дохил шудан ба муассисаҳои таҳсилоти олии касбии кишвар мебошад.
Ногуфта намонад, ки аз ин пас мо худро дар масоили сиёсии кишвар ва ҳаллу фасли онҳо чун узви ҳизб масъул меҳисобем ва барои расидан ба ҳадафҳое, ки аз Оиннома ва Барномаи ҳизб бармеоянд, талош хоҳем кард, гуфт Хуршед Тешаев.
Дар охир ба 12 нафар аъзои нав шаҳодатномаҳои ҳизбӣ супорида шуд.
