Душанбе, 24-уми апрели соли 2019
Маркази миллии тестии назди Президенти Ҷумҳурии Тоҷикистон бо мақсади ҷамъоварии фикру андешаҳои донишҷӯён дар бораи низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ (ИМД) ва муайян кардани баъзе аз масъалаҳои марбут ба имтиҳонҳои мазкур ҷиҳати бартараф кардани мушкилоту камбудиҳо, такмили низоми ИМД ва дар сатҳи боз ҳам хубтар ба роҳ мондани он пурсиши донишҷӯёни соли якуми таҳсилро, ки дар соли 2018 тавассути ин низом ба муассисаҳои таълимии таҳсилоти миёна ва олии касбии Ҷумҳурии Тоҷикистон дохил шудаанд, доир кард.
Барои пурсиш, ки онро гурӯҳи кории иборат аз кормандони Марказ аз 8 ум то 15 уми апрел доир кард, тибқи натиҷаҳои намунабардорӣ (выборка) аз рӯйи таҳлили натиҷаҳои озмунҳои тақсимоти ИМД-2018 ҳамагӣ 5003 донишҷӯй дар доираи муассисаҳои таълимии таҳсилоти миёна ва олии касбӣ бо дарназардошти забони таҳсили тоҷикӣ (4225 нафар) ва русӣ (778 нафар) ба нақша гирифта шуда буд.
Раванди коркарди натиҷаҳои пурсиш барои таҳияи ҳисобот идома дорад.
