Душанбе, 14-уми ноябри соли 2024
Таърихи куҳандиёри тоҷикон пур аз воқеаҳои бузурги сиёсӣ ва иҷтимоӣ аст, ки дар сарнавишти халқи мо нақши тақдирсоз бозидааст. Дар баробари соҳибистиқлол шудан халқу миллати моро роҳбаре насиб гашт, ки тавонист мардуми парешонгаштаи тоҷикро муттаҳид ва дар кишвар сулҳу ваҳдатро пойдор карда, ба ҷанги шаҳрвандӣ хотима бахшад.
Таҷлил намудани санаҳои таърихиву тақдирсоз дар кишварҳои гуногун таърихи хеле қадимӣ дорад. Ҷомеаҳои мутамаддин ҳамеша санаҳои сарнавиштсоз ва муҳимро гиромӣ дошта, ба хотири арҷ ва эҳтиром гузоштан чунин рӯзҳоро бо шукӯҳу тантанаи хос таҷлил менамоянд.
Бо ин мақсад имрӯз дар Маркази миллии тестии назди президенти Ҷумҳурии Тоҷикистон низ бо иштироки кормандони он ва раиси фраксияи ҲХДТ дар Маҷлиси намояндагони Маҷлиси Олии Ҷумҳурии Тоҷикистон Обидзода Фозил Саид, муовини раиси фраксияи ҲХДТ дар Маҷлиси намояндагон Қосимӣ Файзулло ба муносибати Рӯзи Президенти Ҷумҳурии Тоҷикистон ҷаласаи тантанавӣ баргузор шуд.
Дар оғози маҷлис директори Марказ Ҷаъфарзода Сабзалӣ Файзалӣ дар бораи ин санаи муҳимми таърихӣ суханронӣ кард.
Дар идома Раиси фраксияи ҲХДТ дар Маҷлиси намояндагон Обидзода Фозил Саид суханронӣ карда, ин санаи фархундаро ба ҳамаи иштирокдорони ҷаласа муборакбод гуфт.
Зикр гардид, ки ҳамасола рӯзи 16-уми ноябр мувофиқи Қонуни Ҷумҳурии Тоҷикистон «Дар бораи рӯзҳои ид» ҳамчун Рӯзи Президенти Ҷумҳурии Тоҷикистон ҷашн гирифта мешавад. Сабаби ба ин рӯз рост омадани чунин ҷашни муборак дар он аст, ки маҳз дар ҳамин рӯзи таърихӣ, яъне 16-уми ноябри соли 1994 муҳтарам Эмомалӣ Раҳмон бори нахуст ҳамчун Президенти Ҷумҳурии Тоҷикистон дар назди халқу Ватан савганд ёд карданд.
Таъкид шуд, ки Президенти кишвар муҳтарам Эмомалӣ Раҳмон дар шароите ба саҳнаи сиёсат ворид гардид, ки низоми сиёсии давлат фалаҷ гардида, давлат дар ҳолати нобудшавӣ қарор дошт. Ҷанги шаҳрвандӣ ва бозиҳои сиёсии гурӯҳу давлатҳои манфиатхоҳ суботу оромии ҷомеаро аз байн бурда буданд. Дар ин давраи ҳассос ва душвор Эмомалӣ Раҳмон бо андешаи барқарории сулҳу ваҳдат аз байни мардум ва барои мардум ба саҳнаи сиёсат ворид гардида, фаъолияти худро оғоз намуд. Маҳз ҷонфидоӣ, талошҳо ва ҷасорати Эмомалӣ Раҳмон омиле шуд, ки суботу ҳамгироии миллӣ дар мамлакат барқарор гардида, ваҳдати миллӣ тантана ёфт. Имрӯз дар фазои субот, ҳамгироӣ ва ваҳдату якдилӣ рушд намудани Ҷумҳурии Тоҷикистон самараи фаъолияти сулҳофаринии Пешвои миллат, муҳтарам Эмомалӣ Раҳмон аст.
