Душанбе, 16 ноябри соли 2023
16-уми ноябри ҳар сол дар Ҷумҳурии Тоҷикистон Рӯзи Президенти Ҷумҳурии Тоҷикистон ҳамчун ид таҷлил мегардад. Ин рӯз чун нишони арҷгузории хидматҳои бузургу таърихии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷашн гирифта мешавад.
Ҷашн гирифтани Рӯзи Президенти Ҷумҳурии Тоҷикистон дорои аҳаммияти зиёди сиёсию тарбиявист. Бо таҷлили ин рӯз ҷомеаи кишвар, қабл аз ҳама, ба дарки нақши Президент дар рушду пешрафти давлат мерасанд. Инчунин, нақши ниҳоди президентӣ дар таҳкиму тақвияти муносибатҳои ҷамъиятию таъмини амнияти миллӣ дарк карда мешавад.
Ба муносибати ин рӯзи таърихӣ – Рӯзи Президенти Ҷумҳурии Тоҷикистон 16-уми ноябри соли 2023 дар маҷлисгоҳи Маркази миллии тестии назди Президенти Ҷумҳурии Тоҷикистон ҷаласаи идона баргузор шуд.
Ҷаласа бо сухани директори Марказ Ҷаъфарзода Сабзалӣ Файзалӣ оғоз гардид. Ӯ, аз ҷумла қайд кард, ки ҷашн гирифтани Рӯзи Президент дар мамлакатҳои гуногуни ҷаҳон собиқаю таърихи хеле қадим дорад ва имрӯз дар як қатор давлатҳо чунин рӯз бо шукӯҳу шаҳомати хоса ҳамчун ид таҷлил мешавад. Парлумони Тоҷикистон соли 2016 ба Қонуни Ҷумҳурии Тоҷикистон “Дар бораи рӯзҳои ид” илова ворид кард, ки дар асоси он 16-уми ноябр ҳамчун Рӯзи Президенти Ҷумҳурии Тоҷикистон эълон гардид. Ин муқаррарот бо дарназардошти саҳми шоёни Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ташаккули давлатдории навини кишвар, эҳёи давлати миллӣ, таъмини сулҳу ваҳдат ва баланд бардоштани нуфузу эътибори Тоҷикистон дар арсаи байналмилалӣ сурат гирифтааст.
Директори Марказ Ҷаъфарзода С. Ф. вазифаи ҷонии ҳар як шаҳрванд будани арҷгузории талошу заҳматҳои фарзанди неки миллат ва абармарди хираду сиёсат Президенти Ҷумҳурии Тоҷикистон муҳтарам Эмомалӣ Раҳмон ва дар пайравӣ ба ӯ саҳм гузоштан дар рушди устувори Тоҷикистонро таъкид карда, дар хотимаи сухан ҳозиринро ба муносибати Рӯзи Президенти Ҷумҳурии Тоҷикистон муборакбод гуфт.
Баъдан дар бораи ҷаҳду талошҳои Президенти Ҷумҳурии Тоҷикистон муҳтарам Эмомалӣ Раҳмон ба ҳайси сарвари кишвар барои ҳалли муҳимтарин масъалаҳои сиёсию иҷтимоӣ, аз ҷумла хотима гузоштан ба ҷанги бародаркуш, баргардонидани гурезаҳои иҷборӣ, ба эътидол овардани вазъи мамлакат, гирифтани аслиҳа аз дасти гурӯҳҳои силоҳбадаст, ба ҳам овардани тамоми сокинони ҷумҳурӣ, ба даст даровардан ва барқарории сулҳу ваҳдати комил дар саросари қаламрави кишвар, наҷоти аҳолии мамлакат аз фақру камбизоатӣ ва таъмини ҳуқуқу озодиҳои шаҳрвандон мутахассиси фанни забони тоҷикии Марказ Сабуров Абдуҳаннон барои аҳли маҷлис маъруза кард. Дар атрофи мавзуъ чанд нафар аз кормандони Марказ ва мудири шуъбаи таблиғот ва иттилооти Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ Гадоев Абдурасул музокира ва изҳори андеша намуданд.
