24-уми ноябри соли 2022 дар маҷлисгоҳи дафтари асосии Маркази миллии тестии назди Президенти Ҷумҳурии Тоҷикистон бо иштироки директори Марказ Ҷаъфарзода Сабзалӣ Файзалӣ ва кормандони Марказ ба муносибати иди Рӯзи Парчами давлатии Ҷумҳурии Тоҷикистон ҷаласа баргузор гардид.
Ҷаласаро директори Марказ Ҷаъфарзода Сабзалӣ Файзалӣ кушода, кормандони Марказро ба муносибати Рӯзи Парчами давлатии Ҷумҳурии Тоҷикистон табрик кард. Ӯ аз ҷумла, қайд кард, дар таърихи давлатдории тоҷикон парчаму парчамдорӣ ҷойгоҳи хос ва таърихи беш аз 4000-соларо дорост. Бо таъмини амну оромиш дар кишвар заминаи ҳуқуқии рамзҳои давлатӣ низ устувор гардид. Аз ҷумла, бо дастури Президенти Ҷумҳурии Тоҷикистон муҳтарам Эмомалӣ Раҳмон Низомнома дар бораи Парчами давлатии Ҷумҳурии Тоҷикистон ва Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон» қабул гардиданд. Парчаме, ки дар пойтахти ҷумҳурӣ – шаҳри зебоманзарамон Душанбе қомат афрохтааст, яке аз баландтарин парчамҳои дунё ба ҳисоб рафта, дар китоби «Рекордҳои Гиннес» ворид гардидааст. Парафшонии он дар баландии 165 метр, воқеан, боиси ифтихори ҳар шаҳрванди ватандӯсти кишвар аст. Насби Парчами давлатӣ бо маҷмуи биноҳои маъмурию фарҳангӣ ба шаҳри Душанбе ҳусни нав зам карда, мавзеи ҷойгиршавии онро «Майдони парчам» номгузорӣ намуданд.
Дар ҷаҳони муосир халқу миллатҳое, ки соҳиби парчам ва давлат нестанд, хеле зиёданд. Аз иқболу сарнавишти неки мардуми шарафманди Тоҷикистон аст, ки парчами миллати фарҳангбунёди мо дар қатори беш аз 180 давлати дунё дар пештоқи маҷмааи Созмони Милали Муттаҳид ва биноҳои созмонҳои байналмилалию минтақавӣ парафшонӣ мекунад, ки ин баёнгари пайванди амалии Ҷумҳурии Тоҷикистон ба ҷомеаи ҷаҳонист, – гуфт Ҷаъфарзода С.Ф.
Сипас маърузаи Абдуллоев Р. – сармутахассиси фанни таърихи Марказ дар мавзуи «Эҳтироми парчам эҳтироми миллат аст» ироа гардид. Номбурда таъкид намуд, ки Рӯзи Парчами давлатии Ҷумҳурии Тоҷикистон бо фармони Президенти Ҷумҳурии Тоҷикистон Эмомалӣ Раҳмон расман таҷлил мешавад. Соли 2009 бо ибтикори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 24-уми ноябр Рӯзи парчами давлатӣ эълон гардид ва ин рӯзи муборак ҳамасола бо шукӯҳу тантана таҷлил мегардад. Парчам дар радифи дигар муқаддасоти миллӣ – Конститутсия, Нишони давлатӣ ва Суруди миллӣ яке аз рукн ва рамзҳои давлатдорӣ мебошад, ки аз ҳастии миллат ва давлати воҳид шаҳодат медиҳад.
Мазкур, аз ҷумла қайд кард, ки Парчами давлатии Ҷумҳурии Тоҷикистон ифодагари ҳаёти осоишта, меҳнатдӯстӣ, бахту иқболи сафед, умеди мардум ба ояндаи нек аст. Парчами миллат, дар қатори дигар муқаддасот, рамзи давлату давлатдорӣ ва нангу номуси миллӣ мебошад.
Эҳтирому арҷгузорӣ ба рамзҳои миллӣ ба халқи мо аз аҷдодамон мондааст. Пайдоиши парчам таърихи қадима дорад. Агар ба рамзҳо бо назари таҳқиқ ва таҳлил нигарем, ҳар як рамз то андозае равшангари таърих, сарнавишту саргузашти қавмҳо, халқиятҳо, миллату давлат, инъикосгари фарҳангу тамаддун, орзуву ормонҳои мардум аст. Ҳамзамон, эҳтироми Парчами давлатӣ дар баробари арҷгузориву ифтихор ба давлат, гузаштаву имрӯз ва фардои халқи азизамон омили муҳимми таҳкими худшиносии миллӣ ва ифтихори ватандорӣ мебошад, – қайд шуд, аз ҷумла дар маъруза.
Дар хотимаи ҷаласа директори Марказ Ҷаъфарзода С.Ф. ҳозиринро ба муносибати иди Рӯзи Парчами давлатии Ҷумҳурии Тоҷикистон боз як бор табрик гуфта, барояшон тансиҳатию хушбахтӣ ва саодатмандиро таманно кард.
