Душанбе, 19-уми январи соли 2018
Санаи 22 декабри соли 2017 Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Паёми худро ироа карданд. Албатта, аз паём то паём вазъи некӯаҳволии мардуми кишварамон беҳтар гашта истодааст ва шукронаи онро мекунем, ки дар фазои кишвар сулҳу оромӣ ва якдилӣ ҳукмфармо аст. Паёми имсолаи Сарвари давлатамон бо таҳлили вазъи олам оғоз гашт. Дар он Пешвои миллат чунин баён карданд: “Вақтҳои охир дар ҷаҳон раванди бартариҷӯӣ, мусаллаҳшавии бошитоб, пайдоиши нишонаҳои марҳалаи нави “ҷанги сард” боиси нигаронӣ гардидааст.
Соли ҷорӣ дар гӯшаҳои гуногуни олам нооромиву низоъҳо идома ёфта, барои ҷомеаи ҷаҳонӣ ҳамчун айёми душвору пуртазод эътироф гардид.
Дар ин давра зиёда аз сад давлати дунё мавриди ҳамлаҳои ғайриинсонии террористон ва ифротгароён қарор гирифт.
Воқеият чунин аст, ки ҷуғрофияи нооромиҳо торафт доман паҳн намуда, таҳдиду хатарҳои глобалӣ имрӯз ба асосҳои бунёдии тартибу низоми ҷаҳонӣ ва усулҳои муносиботи байналмилалӣ таъсиргузор мебошанд.
Идомаи минбаъдаи ин ҳолат метавонад боиси амиқ гардидани таҳдиду хатарҳои сиёсиву иқтисодӣ, амниятӣ ва башариву фарҳангӣ дар минтақаҳои гуногуни олам гардад”.
Пешвои миллат борҳо таъкид кардаанд, ки террорист дин, миллат мазҳаб надорад. Ин падидаи нанговар мебошад ва ба дини мубини ислом ва ё динҳои дигар мутааллиқ нест.
Инсоният новобаста аз дину ойину мазҳабу эътиқод, ирқу нажоду ранги пӯст, симои зоҳирӣ, макони зист ва ғайра бандаи Худованд аст ва дар назди Парвардигор амонатдор мебошад. Парвардигори олам дар сураи Аҳзоб ояти 72 мегӯяд: “Ҳамоно, ки мо амонатро бар осмонҳо, замин ва кӯҳҳо пешниҳод намудем ва онҳо нахостанд онро таҳаммул кунанд ва мушкилашон шуд, вале инсон онро бардошт”.
Ҳофизи Шерозӣ, раҳматуллоҳи алайҳи, гуфтанд:
Осмон бори амонат натавонист кашид,
Қуръаи фол ба номи мани девона заданд.
Яъне амонати тамоми ҳаёти рӯи замин бар дӯши ҳамаи инсонҳост, аммо имрӯз дар баъзе мамлакати дунё қатлу ғорат, хунрезӣ ва ҷангу ҷидол мебошад, ҳатто вабои аср экстремизм ва терроризм рӯз то рӯз зиёдтар ба чашм мерасад.
Инсоният дар назди Парвардигораш амонатдор аст, ки худашро, танашро ҳифз кунад, обу хоки ҷои зисташро ҳифз кунад. Аз ин ҳифзи ҳаёти ҳар инсон ба инсони дигар низ амонат аст.
Ҳанӯз соли сипаришуда Пешвои миллат дар Паёми худ хеле ғамхорона доир ба мубориза бо экстремизму терроризм сухан карданду ин корро яке аз вазифаҳои афзалиятноки давлатӣ номиданд: “Вазъи бамиёномада фароҳам овардани заминаҳои дахлдори ташкиливу ҳуқуқӣ ва фазои оштинопазирро бо экстремизм ва терроризм дар сатҳи барномаи стратегии давлат тақозо дорад. Аз ин лиҳоз, ба Прокуратураи генералӣ супориш дода мешавад, ки дар ҳамкорӣ бо дигар мақомоти дахлдори давлатӣ ҳарчи зудтар Стратегияи миллии Ҷумҳурии Тоҷикистонро оид ба муқовимат ба экстремизм ва терроризм барои солҳои 2016 – 2020 таҳия ва пешниҳод намояд”.
Дар ин сухани Пешвои миллат як навъи масъулият назди миллат, ғамхорӣ ба хурду калони миллат аст. Ин суханронии дилсӯзонаи Эмомалӣ Раҳмон беихтиёр ҳадиси Расули акрам Муҳаммад Мустафо, саллалоҳу алайҳи ва салламро ба хотир меорад, ки фармудаанд: “Куллукум роъин ва куллукум масъулун ан раиятиҳи” – Яъне ҳар кадоми шумо барои раияти худатон масъул ҳастед. Ин ҳадиси муборак ҳар касро вазифадор мекунад, ки масъулияти тобеонашро дарк кунад. Ҳар падар дар оила масъули аҳли хонаводааш аст, раиси маҳалла масъули маҳалли зисташ, раиси деҳ, раиси ноҳия, вилоят ва раиси ҷумҳур ҳам дар назди раияти худ масъулият дорад. Ба андешаи мо масъулияти Пешвои миллат пеш аз ҳама тинҷию амонии мамлакат мебошад.
Пӯшида нест, ки баъзе кишварҳо ба таври рӯирост ва ё пӯшида ташкилоту созмонҳои террористиро ҷонибдорӣ мекунанд. Дар ин маврид Пешвои миллат ба ҷомеаи ҷаҳонӣ муроҷиат карданду чунин иброз доштанд: “Ислоҳи ин вазъ таҳкими пойгоҳи ҳуқуқии мубориза бо терроризм ва экстремизм, аз ҷумла, дар санадҳои байналмилалӣ муқаррар намудани муҷозоти кишварҳои ба терроризм мусоидаткунанда, роҳандозӣ намудани тафтиши байналмилалии зуҳуроти терроризм ва мавриди муҳокимаи Суди байналмилалӣ қарор додани роҳбарони сиёсӣ ва ҳарбӣ, фондҳои ба ном хайрия, соҳибкорон ва дигар ашхоси ба терроризм мусоидаткунандаро тақозо менамояд”.
Муборизаи беамон бо экстремизм ва тероризм яке аз роҳҳои таъмин намудани оромӣ дар кишвар аст. То ҳар фарди миллат ақидаи солими меҳанпарастонаро дар ниҳодаш парвариш накунад, ободии кишвар ба мушкилӣ дучор мегардад.
Мо-ходимони дин ҳама вақт ҷонибдори иқдомҳои наҷиби Сарвари давлат будем ва ҳастем. Аз ҷумла, Паёми Пешвои миллатро сармашқи кори худамон қарор дода намегузорем, ки_ сулҳу субот ва Ваҳдати миллӣ на танҳо вазифаи мақомоти давлатӣ аст, балки он вазифаи ҷонии ҳар фарди ҷомеа мебошад. Мо намегузорем, ки минбари масҷидҳо макони ихтилоф бошад, кӯшиши мо ба он равона гаштааст, ки минбару меҳроби масоҷид муттаҳидкунандаи мусалмонони кишвар гардад.
Абдусаттор Юсупов,
имомхатиби масҷиди ҷомеи ба номи Абдулбоқии ҷ/д Ҳакимии ноҳияи Нуробод
Бознашр аз сомонаи Кумитаи оид ба корҳои дин, танзими анъана ва ҷашну маросимҳои миллии назди Президенти Ҷумҳурии Тоҷикистон (http://din.tj/?q=node/513).
