Душанбе, 3-юми апрели соли 2018
Дар маҷлисгоҳи Маркази миллии тестии назди Президенти Ҷумҳурии Тоҷикистон бо иштироки ҳамаи кормандони он ҷаласа, ки ба Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” ва татбиқи он бахшида шуда буд, баргузор гардид. Дар ҷаласа намояндаи Кумитаи оид ба корҳои дин, танзими анъана ва ҷашну маросимҳо Хоҷамиров М. иштирок кард.
Икромӣ Х. И, директори Марказ, ҷаласаро оғоз намуда, баъди муаррифии намояндаи Кумита ба ҳозирин иштирокдоронро аз рӯзномаи вохӯрӣ иттилоъ дод. Директори Марказ дар аввал аҳамияти Қонуни Ҷумҳурии Тоҷикистонро “Дар бораи танзими анъана ва ҷашну маросим дар Ҷумҳурии Тоҷикистон” ба ҷомеаи кишвар қайд карда, аз ҷумла, баён дошт , ки кормандони Марказ низ ҳамаҷониба мекӯшанд, ки дар татбиқи Қонуни мазкур саҳмгузор бошанд. Бо ин мақсад дар муассиса Комиссия оид ба танзими анъана ва ҷашну маросим амал мекунад.
Сипас намояндаи Кумитаи оид ба корҳои дин, танзими анъана ва ҷашну маросимҳо Хоҷамиров М. баромад карда, аз ҷумла, дар бораи таърих ва ҳадафҳои қабули Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” (08.06.2007, № 272), тағйироту иловаҳои ба он воридшуда (солҳои 2008, 2010, 28.08.2017, №1461) ва моҳияти аҳамияти қонуни мазкур тазаккур дод. Номбурда гуфт, ки давлату ҳукумати кишвар таҳти роҳбарии хирадмандонаи Президенти Ҷумҳурии Тоҷикистон, муҳтарам Эмомалӣ Раҳмон, баҳри беҳтару хубтар кардани шароити зиндагии мардум ва кам кардани сатҳи камбизоатӣ дар кишвар бо қабули ин қонун хизмати бузург кардаанд. Қайд гардид, ки дар қабули қонуни мазкур ташаббуси худи мардуми Тоҷикистон низ ҳаст, ки бо аризаи бешумор ба Ҳукумати Ҷумҳурӣ ва Дастгоҳи иҷроияи Президенти Ҷумҳурии Тоҷикистон муроҷиат кардаанд.
Директори Марказ Х. Икромӣ таъкид намуд, ки Марказ низ, дар баробари Кумита ва дигар вазорату идораҳои дахлдор, барои риоя ва иҷрои талаботҳои ин Қонун ҳангоми баргузории тӯю маъракаҳо ва умуман, барои пешгирӣ аз вайрон кардани меъёрҳои он дар доираи салоҳияту имкониятҳояш чораҳои зарурӣ меандешад.
Дар охир кормандони Марказ оид ба масъалаҳои танзими анъана ва ҷашну маросим дар Ҷумҳурии Тоҷикистон ба намояндаи Кумитаи оид ба корҳои дин, танзими анъана ва ҷашну маросимҳо Хоҷамиров М. саволҳо дода, посух гирифтанд.
