Душанбе, 28-уми марти соли 2024
28-уми марти соли 2024 дар Муассисаи давлатии таълимии “Мактаби байналмилалии Президентӣ” дар шаҳри Душанбе даври чорум (ниҳоӣ)-и олимпиадаҳои ҷумҳуриявии фаннӣ равияи ҷамъиятӣ-гуманитарӣ барои хонандагони синфҳои 11-и муассисаҳои таълимии таҳсилоти миёнаи умуми кишвар баргузор шуд.
Олимпиадаҳои фаннии равияи табиӣ-риёзӣ ва технологияи иттилоотӣ 29-уми марти соли ҷорӣ баргузор хоҳад шуд.
Олимпиадаҳои мазкурро ҳар сол Маркази миллии тестии назди Президенти Ҷумҳурии Тоҷикистон якҷоя бо Муассисаи давлатии “Маркази ҷумҳуриявии дарёфт ва рушди истеъдодҳо” ба роҳ мемонад.
Дар маросими ифтитоҳи он Раҳим Саидзода, вазири маориф ва илми Ҷумҳурии Тоҷикистон, Сабзалӣ Ҷаъфарзода, директори Маркази миллии тестии назди Президенти Ҷумҳурии Тоҷикистон (Марказ), Зиёдулло Абдулзода, муовини вазири маориф ва илм, роҳбарияти Маркази ҷумҳуриявии дарёфт ва рушди истеъдодҳо, инчунин намояндагони дигари зерсохторҳои маорифи мамлакат, хонандагони макотиби миёна ва омӯзгорони муассисаҳои таълимӣ иштирок намуданд.
Раҳим Саидзода, вазири маориф ва илми кишвар, иштирокдорони даври чоруми олимпиадаҳои ҷумҳуриявиро барои то ба ин давр расиданашон таҳният гуфта, зикр кард, ки яке аз вазифаҳои асосии маорифи муосир дар шароити таҳсилоти ҳамгироӣ дарёфт ва рушди истеъдодҳои ҷавону эҷодкор ва ботафаккур мебошад. Чунин чорабиниҳое, ки ба ҳалли ин масъала нигаронида шудаанд, пеш аз ҳама, олимпиадаҳо ба ҳисоб мераванд ва яке аз ҳадафҳои Вазорати маориф ва илми Ҷумҳурии Тоҷикистон таҳким бахшидан ба вусъати ҳаракати олимпӣ дар ҷумҳурӣ мебошад. Пешвои муаззами миллат таъкид мекунанд, ки танҳо насли мусаллаҳ бо донишҳои муосир метавонад барои пешрафти Ҷумҳурии Тоҷикистон саҳми муносиби худро гузорад, – дар идома гуфт вазир.
Сипас Сабзалӣ Ҷаъфарзода, директори Марказ, суханронӣ намуда, аз ҷумла, гуфт, ки танҳо ҳамонҳое ба даври охирини олимпиадаҳо роҳ меёбанд, ки дар таҳсил муваффақ буданд, кӯшишу талоши зиёд кардаанд, дар омӯхтани фанҳои мактабӣ ва аз худ кардани барномаҳои таълимӣ хеле заҳмат кашидаанд. Он донишу маҳорат ва малакае, шумо – хонандагон то ин дам ба даст овардаед, бароятон беманфиат нест ва ҳатман дар таҳсилоти минбаъдаатон коромаду манфиатбахш хоҳад буд. Таъмини принсипҳои адолату шаффофиятро, чун дар имтиҳонҳои марказонидаи дохилшавӣ, Марказ кафолат медиҳад, – афзуд ба суханаш Ҷаъфарзода С.
Ғолибони ин олимпиадаҳо ҳангоми дохилшавӣ ба муассисаҳои таълимии таҳсилоти миёна ва олии касбӣ аз рӯйи ихтисосҳои дахлдор соҳиби имтиёзҳои шоиста – аз 50 то 100 бал мегарданд.
Лозим ба зикр аст, ки дар олимпиадаҳои номбурда имсол тибқи нақша 1127 нафар хонанда аз фанҳои равияҳои ҷамъиятӣ-гуманитарӣ ва табиӣ-риёзӣ иштирок мекунанд. Ғолибони даври ҷумҳуриявии олимпиадаи фаннӣ 31-уми марти соли равон эълон мегарданд.
