Душанбе, 26-уми майи соли 2025
26-уми майи соли ҷорӣ дар муассисаи таълимии таҳсилоти миёнаи умумии № 19-и ноҳияи Синои шаҳри Душанбе бо мақсади омодагӣ барои баргузории имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2025 семинари омӯзишӣ барои тренерон оғоз гардид.
Дар оғози семинар директори Марказ Ҷаъфарзода Сабзалӣ Файзалӣ вобаста ба моҳият ва тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ андешаронӣ намуда, аз масъулин ва иштирокдорони семинар даъват кард, ки барои омода кардани кормандони муваққатии марказҳои имтиҳонӣ ва босифат анҷом додани корҳо дар ин самт талош намоянд.
Тренерони баъди омӯзиш омодашуда кормандони муваққатии марказҳои имтиҳониро меомӯзонанд ва онҳоро барои қабул ва гузаронидани имтиҳонҳо тайёр менамоянд.
Семинарҳои омӯзишии тренерон барои намояндагони шаҳри Душанбе, шаҳру ноҳияҳои тобеи ҷумҳурӣ ва Вилояти Мухтори Кӯҳистони Бадахшон бо иштироки 23 нафар шунаванда аз 26-ум то 27-уми майи соли 2025 дар муассисаи таълимии таҳсилоти миёнаи умумии № 19-и ноҳияи Синои шаҳри Душанбе, аз 29-ум то 30-юми май дар бинои бахши минтақавии Марказ дар шаҳри Хуҷанд барои намояндагони шаҳру ноҳияҳои вилояти Суғд бо иштироки 18 нафар шунаванда, аз 29-ум то 30-юми май дар бахши минтақавии Марказ дар шаҳри Бохтар барои намояндагони шаҳру ноҳияҳои водии Вахши вилояти Хатлон бо иштироки 14 нафар шунаванда ва аз 29-ум то 30-юми май дар муассисаи таҳсилоти умумии № 6-и шаҳри Кӯлоб барои намояндагони шаҳру ноҳияҳои минтақаи Кӯлоби вилояти Хатлон бо иштироки 16 нафар шунаванда баргузор мегардад.
32 нафар корманди асосии Марказ ҳамроҳ бо тренерон дар давоми моҳи июни соли ҷорӣ дар 21 шаҳру ноҳияи ҷумҳурӣ семинарҳои омӯзиширо барои кормандони муваққатии марказҳои имтиҳонӣ ташкил ва баргузор менамоянд.
Ҳайати гурӯҳи корӣ барои ташкил ва баргузории семинари омӯзишии тренерон барнома, модули омӯзишӣ ва маводди иловагии ёрирасонро омода намуда, пас аз ду рӯзи дарсӣ ба шунавандагон дар асоси дарси гузашта саволномаҳо пешниҳод менамоянд. Шунавандагон мувофиқи талаботу принсипҳои муқарраршуда арзёбӣ карда мешаванд.
Бояд қайд намуд, ки тибқи эълони пешакӣ барои иштирок дар озмуни интихоби корманди муваққатӣ ба ҳайси тренер 81 нафар хоҳишманд ҳуҷҷат пешниҳод намуданд. Баъд аз омӯзиш ва таҳлилҳо ба 71 нафар хоҳишманд иҷозат дода шуд, ки дар семинарҳои омӯзишии тренерон иштирок намоянд. Аз байни онҳо зиёда аз 60 нафар ба ҳайси тренер интихоб ва ба кори муваққатӣ дар Марказ ҷалб карда мешаванд.
